ᑐᑦᑕᕐᕕᖓ > ᐊᓯᔾᔨᐸᓪᓕᐊᓂᖏᑦ > ᐃᓄᐃᑦ ᖃᐅᔨᒪᔭᑐᖃᖏᑦ: ᐊᖓᒃᑰᓂᕐᓗ ᐅᓪᓗᒥᓕᓴᐅᓕᖅᑐᓄᑦ ᓇᒻᒪᙱᓐᓂᓪᓕᐅᖅᐸᒃᑐᓂᒃ ᐋᖅᑭᒃᓱᐃᓂᖅ >

ᐅᖃᖅᑕᐅᓯᒪᔪᑦ:
ᔫᓯ ᐊᖑᑎᓐᖑᕐᓂᖅ

 « ᐅᐊᑦᑎᐊᕈᓕ, ᓴᕝᕕᓐᓂᒃ ᐋᓐᓂᐊᓚᑦᑎᓐᓂᕈᒪ, ᐊᑲᒃᑯᕐᒨᖅᓯᒐᔭᖅᑐᖓ ᑭᓱᑐᐃᓐᓇᕐᒥᑦ. ᐊᖓᒃᑯᖅ ᖃᐅᔨᒐᓱᐊᑦᑕᓕᖅᑯᖅ ᐊᑲᐅᓐᖏᓕᐅᕈᑎᒋᔭᕐᓂᑦ. ᖃᐅᔨᓚᐅᖅᓪᓗᒍ, ᐊᖓᒃᑰᑉ ᒪᒥᑎᑦᑕᓕᖅᑳᖓ. ᐅᖃᐅᓯᕆᓐᖏᑕᖃᕐᓂᕈᒪ, ᐅᖃᐅᓯᕆᖅᑳᕆᐊᖃᕋᔭᖅᑕᒃᑲ. ᑕᒻᒪᕐᓂᕐᓚᐅᖅᓯᒪᔭᕐᓂᑦ ᐅᖃᐅᓯᖃᓚᐅᖅᓯᒪᓐᓂᖏᒃᑯᒪ, ᐅᕙᓐᓃᖏᓐᓇᖅᑲᑦ, ᖃᓂᒻᒪᔾᔪᑎᒋᔪᓐᓇᖅᑕᕋ. ᐃᓗᓐᓂᑦ ᑎᒍᒥᐊᖏᓐᓇᕐᓂᕈᒪ ᐅᖃᐅᓯᕆᓚᐅᖅᓯᒪᓐᖏᓪᓗᒍ ᑲᓐᖑᒋᔭᕐᓂᑦ, ᖃᓂᒻᒪᔾᔪᑎᒋᒐᔭᖅᑕᕋ, ᑕᑯᔭᐅᓕᕐᓗᓂ. ᐅᖃᐅᓯᕆᔪᒪᓐᓂᖏᒃᑯᒃᑯ, ᑎᒍᒥᐊᖏᓐᓇᕐᓗᒍ, ᖃᓂᒪᐃᓐᓇᕋᔭᖅᑐᖓ. ᑭᓱᑐᐃᓐᓇᕐᒥᑦ ᑎᒍᓯᓐᓂᕈᒪᑦ, ᑕᒻᒪᕐᓂᕈᒪᓘᓐᓃᑦ ᐊᓯᓐᓄᑦ ᐃᓅᖃᑎᓐᓄᑦ, ᑕᑯᔭᐅᓯᒪᓕᖅᑲᑦ, ᓴᓪᓗᒐᓱᐊᕐᓗᓂ ᐱᔭᕆᐊᑐᒐᔭᖅᑐᖅ. ᐃᓚᖏᑦ ᐊᖓᒃᑯᐃᑦ ᓴᓐᖏᓂᖏᓐᓂ ᐊᑐᖅᑐᑎᒃ ᑐᖁᑦᑎᒐᓱᐊᖃᑦᑕᓚᐅᖅᓯᒪᔪᑦ, ᑕᐃᒪᐃᑦᑐᐃᓐᓇᓚᐅᓐᖏᑦᑐᑦ. ᐃᓚᖏᑦ ᐊᖓᒃᑯᑦ ᒪᒥᓴᐃᖃᑦᑕᓚᐅᖅᑐᑦ. ᐅᑉᐱᕆᔭᖃᓪᓚᕆᑉᐳᖓᓕ ᐅᐊᑦᑎᐊᕈ ᐊᖓᒃᑰᕙᔪᔪᑦ ᑕᑯᔪᓐᓇᖃᑦᑕᓚᐅᖅᓯᒪᒻᒪᑕ ᐃᓄᐃᑦ ᑕᒻᒪᕐᓂᒥᓂᖏᓐᓂ » (ᒪᑉᐱᒐᖅ 63) 

ᐅᓂᒃᑳᖅᑐᖅ:
ᓈᓴᐅᑎᒻᒪᕆᖓᓐᓂ 1-ᒥ ᓯᕗᓪᓕᖅᐹᖓᓐᓂ ᐅᓪᓗᖓᓐᓂ ᐃᓕᓐᓂᐊᖅᑐᑦ. ᑎᓴᒪᐅᔪᖅᑐᑦ ᐃᓐᓇᐃᑦ ᐱᖃᑕᐅᓪᓗᑎᒃ ᑭᒃᑰᓂᖏᓐᓂ ᓇᓗᓇᐃᖅᓯᓪᓗᑎᒃ. ᐊᑐᓂ ᐅᓂᒃᑳᖃᖅᑐᑎᒃ ᐃᓚᖏᓐᓂ, ᐅᓂᒃᑳᖅᑐᑎᓪᓗ ᖃᐅᔨᒪᓂᖏᓐᓂ ᐊᖓᒃᑯᕆᓂᕐᒥᑦ, ᐊᑐᖅᓯᒪᔭᖏᓐᓂᓪᓗ ᐅᓂᒃᑳᖃᕆᓪᓗᑎᒃ. ᖃᐅᔨᓚᐅᖅᑐᒍᑦ ᐃᓐᓇᓕᒫᑦ ᖃᐅᔨᒪᓚᐅᖅᑐᑦ ᐊᖓᒃᑯᕆᓂᕐᒥᑦ ᐃᖅᑲᐅᒪᑦᑎᓪᓗᑎᓪᓗ ᑕᑯᖃᑦᑕᕐᓂᒥᓂᕐᒥᓂᒃ ᐊᖓᒃᑯᕐᓂᑦ ᐊᖓᒃᑯᕆᔪᓂᓪᓗ. ᓘᒃ ᓄᓕᐊᔪᖅ ᐅᓂᒃᑳᖃᖅᑐᓂ ᒪᒥᓴᐃᖃᑦᑕᖅᑐᒥᓂᕐᓂᑦ ᐊᖓᒃᑯᕐᓂᑦ ᑕᕐᓂᒥᑦ ᑲᓕᑦᑎᒃ ᐃᓪᓗᕕᒐᕐᒨᕈᔾᔨᓪᓗᑎᒃ ᖃᓂᒪᔪᒥᑦ. ᐲᓕᒃ ᐱᓱᒃ ᐅᓂᒃᑳᖃᖅᑐᓂ ᐅᖃᕆᐊᖃᕐᓂᓚᐅᖅᓯᒪᒻᒪᑦ ᒥᑕᐅᑎᔅᓴᕐᓂᒥᓂᖓᓐᓂ ᖁᐸᓄᐊᕐᒥᑦ ᐊᖓᒃᑯᕐᒧᑦ ᖃᓂᒪᔪᐊᓘᓕᕐᓂᕐᖓᑦ ᒪᒥᓴᖅᑕᐅᒋᐊᖃᓚᐅᖅᓯᒪᔪᖅ. ᓕᕙᐃ ᐃᓗᐃᑦᑐᖅ ᐅᓂᒃᑳᖃᕆᓪᓗᓂ ᖃᖓᑕᔪᒃᑯᑦ ᓯᑭᑐᓚᐅᖅᓯᒪᓂᖓᓐᓂ, ᑐᕐᖓᕐᓄᑦ ᐊᖓᒃᑯᕈᔅᓴᔭᐅᓪᓗᓂ. ᐆᓕ ᐃᑎᓐᓄᐊᖅ ᐅᓂᒃᑳᖃᖅᑐᓂ ᐊᖓᒃᑯᕐᒥᑦ ᓇᔾᔪᖏᑦ ᖃᓂᒪᓂᐊᓗᒻᒥ ᓄᖅᑲᑎᑦᑎᓚᐅᖅᓯᒪᒻᒪᑦ ᑐᖁᔾᔪᑕᐅᓚᐅᖅᓯᒪᔪᒥᓂᕐᓂᑦ ᐊᒥᓱᓄᑦ ᐃᓄᓐᓂᒃ ᐃᓪᓗᓕᒑᕐᔪᒻᒥ ᓇᒻᒥᓂᕐᓗ ᑐᖁᔪᒪᓪᓗᓂ ᐊᖏᖅᓯᒪᓂᕋᓕᖅᑐᓂ ᖃᓂᒪᓂᕐᒧᑦ. ᐊᑐᖅᑕᐅᓯᒪᔪᑦ ᑐᖁᒦᖃᑦᑕᖅᓯᒪᔪᑦ ᐅᓂᒃᑳᕆᔭᐅᓪᓗᑎᒃ ᑎᓴᒪᓂᒃ ᐊᑐᖅᑕᐅᓯᒪᔪᓂᒃ ᐊᖓᒃᑯᕆᓂᕐᒥᑦ. ᐲᑕ ᓱᕙᒃᓯᐊᑦ ᐊᒻᒪᓗ ᒥᐊᓕᐋᓄ ᐊᐅᐱᓛᕐᔪᒃ ᑎᒥᖓᓐᓂ ᐊᓂᓯᒪᓪᓗᑎᒃ ᐅᓂᒃᑳᖃᓚᐅᕐᒥᔫᒃ ᐱᕐᕈᓗᐊᕿᓚᐅᖅᑎᓪᓗᒋᒃ. ᐳᔪᐊᑦ ᑕᐸᖅᑎ ᓯᓚᑐᐃᓐᓇᒦᑦᑐᓂ ᐅᓐᓄᐊᒃᑯᑦ ᐋᓐᓂᐊᔪᐊᓘᓪᓗᓂ ᐅᓂᒃᑳᖃᕆᓪᓗᓂ.