ᑐᑦᑕᕐᕕᖓ > ᐊᓯᔾᔨᐸᓪᓕᐊᓂᖏᑦ > ᐃᓄᐃᑦ ᖃᐅᔨᒪᔭᑐᖃᖏᑦ: ᐊᖓᒃᑰᓂᕐᓗ ᐅᓪᓗᒥᓕᓴᐅᓕᖅᑐᓄᑦ ᓇᒻᒪᙱᓐᓂᓪᓕᐅᖅᐸᒃᑐᓂᒃ ᐋᖅᑭᒃᓱᐃᓂᖅ >

ᐅᖃᖅᑕᐅᓯᒪᔪᑦ:
ᐆᓕ ᐃᑎᓐᓄᐊᖅ

« ᐅᕙᖓᓗ, ᑕᑯᔅᓴᖅᓯᒪᒻᒥᔪᖓ.ᕿᓚᖃᑦᑕᓚᐅᖅᓯᒪᔪᑦ ᐃᑲᔪᕋᓱᐊᖅᑐᑎᒃ ᐃᓄᓐᓂᒃ. ᐊᐱᖅᓱᖃᑦᑕᖅᑐᑎᒃ ᐊᒡᒑᕋᐃᒻᒪᑕ, ᓂᐊᖁᖓ ᐅᕿᑦᑐᑯᓘᒐᔭᖅᑐᖅ. ᓂᐊᖁᖓ ᐅᖁᒪᐃᒃᑲᔭᖅᑐᖅ ᐄᖑᓐᓂᖅᑲᑦ. ᕿᓚᔭᐅᔫᑉ ᓂᐊᖁᖓ, ᕿᓚᔭᖅ. ᓂᐊᖁᖓ ᐅᖁᒪᐃᑉᐸᑦ, ᐊᒃᑭᒐᔅᓴᐅᑦᑎᐊᕋᔭᓐᖏᑦᑐᖅ. ᓱᕙᒃᓯᐅᑦ ᐅᖃᓚᐅᖅᑐᖅ ᐃᓛᓐᓂᒃᑯᑦ ᒪᕐᕉᒃ ᐃᓅᒃ ᐊᓪᓛᒃ ᐊᒃᑭᔅᓯᔪᓐᓇᓚᐅᓐᖏᑦᑐᑦ ᕿᓚᔭᐅᔪᖃᖅᑎᓪᓗᒍ. ᐅᖁᒪᖏᕐᓂᖅᑲᑦ, ᐊᒃᑭᒐᔅᓴᐅᓐᖏᑦᑎᐊᒻᒪᕆᑦᑐᖅ. ᐅᖃᐅᓯᖃᖅᑲᐅᒻᒥᔪᒍᑦ ᖃᐅᔨᒪᓂᕐᒥᑦ. ᕿᓪᓚᑎ ᐊᑐᖅᑕᐅᓂᖅᑲᑦ ᑐᕐᖓᕐᒧᑦ ᐅᐸᑦᑕᐅᑉᐸᑦ ᐅᖁᒪᐃᓪᓕᒐᔭᖅᑐᖅ ᐅᕿᓪᓗᓂᓘᓐᓃᑦ. ᑕᐃᒫᒃ ᐅᖃᐅᔾᔭᐅᕙᓚᐅᖅᓯᒪᔪᒍᑦ. ᑐᕐᖓᐃᑦ ᐃᓅᓐᖏᒻᒪᑕ. ᖁᐊᖅᓵᖅᓴᕋᐃᑦᑐᑦ. ᕿᓚᒐᓱᐊᕐᓂᐊᓕᕈᕕᑦ, ᖃᐅᔨᒪᑦᑎᐊᖃᑦᑕᕆᐊᖃᓚᐅᖅᓯᒪᔪᑎᑦ, ᖃᓪᓕᒍᒪᖃᑦᑕᓚᐅᖅᓯᒪᓐᖏᒻᒪᑕ ᖃᐅᔨᒪᓇᓱᐊᑦᑎᐊᓐᖏᒃᑯᕕᑦ. ᑭᓇᑐᐃᓐᓇᖅ ᕿᓚᒍᓐᓇᖅᑐᒐᓗᐊᖅ, ᖃᐅᔨᒪᓇᓱᐊᑦᑎᐊᓐᖏᒃᑯᑎᒃ ᑲᔪᓯᒐᔭᓐᖏᑦᑐᑦ. » (ᒪᑉᐱᒐᖅ 86) 

 

ᐅᓂᒃᑳᖅᑐᖅ:
ᐃᓐᓇᐃᑦ ᐅᓂᒃᑳᕇᕐᖓᑕ ᐊᑐᖅᓯᒪᔭᕐᒥᓂᒃ ᕿᓱᒪᒋᔭᖏᓐᓂ ᐅᖃᐅᓯᖃᓚᐅᖅᑐᑦ ᐊᖓᒃᑯᕆᓂᕐᒥᑦ, ᑲᑎᒪᑎᑦᑎᔪᑦ ᒪᑐᐃᖅᓯᓕᓚᐅᖅᑐᖅ ᐅᓂᒃᑳᕈᒪᔪᖃᖅᑲᑦ ᐅᑉᐱᓇᕐᓂᖏᓐᓂ ᐊᖓᒃᑯᐃᑦ ᐱᖅᑯᓯᑐᖃᒥᓃᓪᓗ, ᖃᓄᕐᓗ ᐅᓪᓗᒥᐅᔪᖅ ᐊᑦᑐᐊᓂᖃᕐᒪᖔᑕ ᐃᓅᓯᕐᓂᑦ ᐊᑲᐅᓐᖏᓕᐅᕈᑎᖃᖃᑦᑕᖅᑐᓂᒃ, ᐱᓗᐊᖅᑐᓂᒃ ᐃᓅᓱᑦᑐᓄᑦ ᐊᑦᑐᖅᑕᐅᕙᑦᑐᓄᑦ. ᐊᐃᑉᐸᖓᓐᓂ ᓈᓴᐅᑎᒻᒪᕆᒻᒥ, ᑲᑎᒪᑎᑦᑎᔪᑦ ᐃᓐᓇᕐᓂᑦ ᐅᓂᒃᑳᖃᑦᑕᖁᔨᓕᓚᐅᕐᒥᔪᑦ ᐊᔾᔨᒌᓐᖏᑦᑐᓂᒃ ᐃᓱᒪᒋᔭᖏᓐᓂ ᐊᖓᒃᑯᕆᓂᕐᒥᑦ. ᐃᓐᓇᓕᒫᑦ ᐅᖃᖅᑐᐃᓐᓇᐅᖅᑲᐅᒐᓗᐊᖅᑎᓪᓗᒋᑦ ᐊᖓᒃᑰᖏᒻᒪᑕ, ᑕᑯᖃᑦᑕᖅᓯᒪᔪᐃᓐᓇᐅᒐᓗᐊᑦ ᐊᖓᒃᑯᕆᔪᓂᒃ ᐃᖅᑲᐅᒪᔭᖏᓐᓂ ᐅᓂᒃᑳᖃᖅᑐᑎᒃ ᑕᕝᕙᓂ.

ᐊᖓᒃᑯᕈᓂᖅ ᓯᕗᓪᓕᖅᐹᒥ ᐅᖃᐅᓯᐅᓂᐊᖅᑐᖅ ᑲᑎᒪᓂᖏᓐᓂ. ᖃᐅᔨᖅᑲᐅᒐᑦᑕ ᐃᓚᖏᑦ ᐃᓐᓇᐃᑦ ᐊᖓᒃᑯᕈᖃᓴᖃᑦᑕᓂᕐᖓᑕ ᐃᓅᓱᑦᑐᓪᓗᑎᒃ, ᐃᓱᒪᖅᓱᓂᒃᑯᑦ ᐃᓱᒪᖅᓱᓂᒃᑰᖏᑦᑐᒐᓗᐊᖅ. ᐅᖃᐅᓯᐅᓕᕐᒥᔪᖅ ᖃᐅᒪᓂᖅ, ᐃᓅᓯᕐᓂᑦᑐᐃᓐᓇᐃᑦ ᐊᖓᒃᑯᕐᓄᑦ ᑕᑯᔭᐅᕙᑦᑐᑦ ᖃᐅᒪᔪᑦ ᐃᓄᓐᓂᒃ. ᖃᐅᔨᒪᓂᖏᑦ ᐃᓱᒪᖏᓂᓪᓗ ᐊᔾᔨᒌᖃᑦᑕᓚᐅᓐᖏᑦᑐᑦ, ᐃᓱᒪᔪᐃᓐᓇᓚᐅᖅᑐᓪᓕ ᐃᓱᒪᖃᕐᓂᖅᓴᐅᒻᒪᑕ ᑕᕐᓂᒥᑦ. ᖃᐅᔨᒪᓂᕐᒥ ᐅᖃᐅᓯᖃᓚᐅᖅᑎᓪᓗᒍᑦ, ᕿᓚᓂᕐᒥᑦ ᐅᓂᒃᑳᖃᓕᓚᐅᕐᒥᔪᑦ, ᒪᑭᓴᐃᓂᖅ ᐊᖓᒃᑯᑦᑯᑦ ᐊᖓᒃᑰᖏᑦᑐᒐᓗᐊᒃᑯᓪᓗ ᐊᐱᕆᕙᑦᑐᑎᒃ ᑕᕐᓂᓂᒃ ᖃᐅᔨᒍᒪᓪᓗᑎᒃ ᓱᒻᒪᑦ ᖃᓂᒪᒻᒪᖔᑕ.

ᐊᓯᖏᓐᓂ ᐅᖃᐅᓯᖄᕐᔪᓚᐅᕐᒥᔪᑦ ᒪᑲᓂᖓ: ᓄᓇᐃᑦ ᒪᓐᓂᖏᓐᓂ, ᒪᓐᓃᑦ ᓴᐅᓯᒪᕈᔪᑦᑐᑎᒃ ᓇᓂᔭᐅᓲᑦ ᓄᓇᒥ ᓴᓐᖏᓂᖃᕐᓂᕋᖅᑕᐅᓪᓗᑎᒃ: ᒪᒥᓴᕐᓂᕐᒥᑦ (ᐊᓯᐊᒍᑦ ᕿᓚᓂᕐᒥ) ᐊᑐᖅᑕᐅᖃᑦᑕᖅᑐᒥᓃᑦ ᐋᓐᓂᐊᕕᑦᑕᖃᓚᐅᖅᑎᓐᓇᒍ, ᓲᕐᓗ ᐃᕆᓇᓕᐅᑎᓂᕐᒥᑦ ᐊᒻᒪᓗ ᓴᑲᓂᕐᒥᑦ, ᐊᖓᒃᑰᑉ ᑐᕐᖓᖁᑎᖓ ᑎᒥᒨᖅᑐᓂ; ᖃᓄᕐᓗ ᐊᖓᒃᑯᐃᑦ ᐃᑲᔪᖃᑦᑕᓂᕐᒪᖔᑕ ᑳᓐᓇᖅᑐᐊᓘᑎᓪᓗᒍ ᓂᕐᔪᑎᓂᒃ ᑎᑭᑎᑦᑎᕙᑦᑐᑎᒃ; ᐱᒻᒪᕆᐅᓂᖏᑦ ᓯᓐᓇᑦᑐᒪᓂᖅ ᐊᒻᒪᓗ; ᖃᓄᖅ ᐊᑐᖅᑕᐅᕙᓐᓂᕐᒪᖔᑕ ᐋᕐᖑᐊᑦ.