ᑎᑎᕋᖅᑐᑉ ᐅᖃᐅᓯᖏᑦ

67 ᓄᓇᕗᒻᒥ ᐃᓐᓇᐃᑦ ᐊᐱᖅᓱᖅᑕᐅᓚᐅᖅᓯᒪᓕᖅᑐᑦ ᐅᑭᐅᓄᑦ ᖁᓕᓄᑦ 12-ᓂᒃ ᐅᖃᓕᒫᒐᓕᐅᖅᑐᑎᒃ ᖃᕋᓴᐅᔭᒃᑯᑦ ᐊᑐᐃᓐᓇᐅᒋᓪᓗᑎᒃ ᓈᓚᓐᓂᖅ ᐅᐊᑦᑎᐊᕈᕐᓂᓴᕐᓂᑦ ᖃᕋᓴᐅᔭᒃᑯᑦ ᐱᑕᓕᒃ. ᖁᓕᑦ ᐃᓕᓴᐃᔩᑦ ᐱᖃᑕᐅᖃᑦᑕᖅᓯᒪᓪᓗᑎᒃ ᐅᖃᓕᒫᒐᓕᐅᖅᑐᓂᒃ, 12 ᓄᓇᕗᑦ ᓯᓚᑦᑐᖅᓴᕐᕕᖓᓐᓂ ᐃᓕᓐᓂᐊᖅᑏᑦ ᐱᖃᑕᐅᓚᐅᖅᓯᒪᓪᓗᑎᒃ ᐊᐱᖅᓱᖅᑐᑎᒃ, ᐅᑭᐅᒐᓚᓐᓄᑦ. ᑐᓵᔨᖃᐅᖅᓯᒪᓪᓗᑎᒃ, ᐃᓄᑦᑎᑐᓕᕆᔨᓂᒃ ᑕᒻᒪᖅᓯᒪᔪᖅᓯᐅᖅᑎᓂᓪᓗ.

ᓯᕗᓪᓕᖅᐹᖏᓐᓃᑦᑐᓂᒃ ᓈᓚᓐᓂᖅ ᐅᐊᑦᑎᐊᕈᕐᓂᓴᕐᓂᑦ, ᐃᓕᓴᖅᓯᒍᒪᕗᒍᑦ ᐃᑲᔪᖃᑦᑕᓚᐅᖅᑐᓂᒃ ᖃᕋᓴᐅᔭᒃᑯᑦ ᐋᖅᑭᓱᖅᑕᐅᑎᓪᓗᒋᑦ. ᖁᔭᓐᓇᒥᕈᒪᒻᒥᔭᕗᑦ ᐅᖃᓕᒫᒐᓕᐅᖃᑕᐅᓚᐅᖅᑐᑦ ᓄᓇᕗᑦ ᓯᓚᑦᑐᖅᓴᕐᕕᒃᑯᖏᓐᓂ, ᐱᓗᐊᖅᑐᒥᑦ ᓲᓴᓐ ᓵᒪᓐᔅ, ᐊᐅᓚᑦᑎᔨ ᐅᖃᐅᓯᓕᕆᓂᕐᒧᑦ ᐱᖅᑯᓯᓕᕆᓂᕐᒧᓪᓗ ᐃᓕᓐᓂᐊᕈᑎᓂᒃ, ᓱᓕ ᓄᓇᕗᑦ ᓯᓚᑦᑐᖅᓴᕐᕕᒃᑯᖏᓐᓃᑦᑐᑦ ᐅᖃᓕᒫᒐᕐᓂᑦ ᓴᖅᑮᖃᑦᑕᖅᑐᖅ.

ᐃᖃᓗᓐᓂ ᐅᓂᒃᑳᖅᑐᐊᕐᓂᕐᒧᑦ ᐃᓕᕆᐊᑦ ᓴᖅᑭᖅᑕᐅᓚᐅᕐᒥᔪᖅ ᖃᐅᔨᓴᐅᑎᒥᓂᐅᓪᓗᓂ ᐋᖅᑭᓱᖅᑕᐅᓯᒪᓪᓗᑎᒃ ᐅᖃᐅᓯᓕᕆᓂᕐᒧᑦ ᐱᖅᑯᓯᓕᕆᓂᕐᒧᓪᓗ ᐃᓕᓐᓂᐊᕈᑎᖏᓐᓂ ᓄᓇᕗᑦ ᓯᓚᑦᑐᖅᓴᕐᕕᒃᑯᖏᓐᓂ ᐱᓕᕆᖃᑎᖃᖅᑐᑎᒃ ᐸᐃᕆᔭᐃᑦ ᑎᒍᒻᒥᕕᖏᑦ (ᐃᖃᓗᓐᓂ ᐃᓐᓇᕐᓄᑦ ᑲᑐᔾᔨᖃᑎᒌᑦ), ᓄᓇᕗᑦ ᒐᕙᒪᒃᑯᖏᓪᓗ ᐱᖅᑯᓯᓕᕆᔨᒃᑯᖏᑦ, ᐅᖃᐅᓯᓕᕆᔨᒃᑯᖏᑦ, ᐃᓐᓇᐃᑦ ᐃᓅᓱᑦᑐᐃᓪᓗ, ᐊᒻᒪᓗ ᓚᕙᐅ ᓯᓚᑦᑐᖅᓴᕐᕕᕐᔪᐊᖓᓐᓂ le Centre interuniversitaire d’études et de recherches autochtones ᐊᒻᒪᓗ, ᐃᓅᓯᓕᕆᓂᕐᒥᑦ ᐃᓄᓐᓂᓪᓗ ᖃᐅᔨᓴᖅᑏᑦ ᑲᑎᒪᔨᖏᓐᓂ ᑲᓇᑕᒥ ᐊᓯᖏᓪᓗ.

ᖃᕋᓴᐅᔭᒃᑯᑦ ᑕᑯᔅᓴᐅᑎᑕᐅᔪᒫᖅᑐᑦ ᐋᖅᑭᓱᖅᑕᐅᓚᐅᖅᑐᑦ ᐱᓕᕆᖃᑎᖃᖅᑐᑎᒃ ᑮᓇᐅᔭᖅᑎᒍᑦ, ᑲᓇᑕᒥ ᐱᖅᑯᓯᓕᕆᓂᕐᒥᑦ ᖃᕋᓴᐅᔭᒃᑯᑦ ᑕᑯᔅᓴᐅᑎᑕᖏᓐᓂ ᐃᑦᑕᕐᓂᓴᓕᕆᔨᒃᓐᓂ ᑲᓇᑕᒥ.