W/Exgiz wonE/sNhx6t9lQ5 kNc6+v6gu~i5 WJ8Nstq5 vNbu

ᔮᓐ ᐊᒪᕈᐊᓕᒃ

ᑕᑯᒍᒪᓯᒪᒐᑦᑕ ᑲᑎᒪᕕᐅᔪᒥᒃ ᐃᓄᑦᑎᓐᓂ. ᓇᒻᒥᓂᕐᓕ ᒐᕙᒪᖃᕐᓂᕐᒥᑦ ᐅᖃᒪᔭᐅᑎᒋᖃᑦᑕᐅᑎᓕᓚᐅᖅᓯᒪᕗᒍᑦ. ᑲᓇᑕᒥ ᒐᕙᒪᒃᑯᖏᑦ ᓄᓇᖃᖅᑳᖅᓯᒪᔪᑦ ᓄᓇᖃᓚᐅᓐᖏᒻᒪᑕ ᐱᔪᓐᓇᐅᑎᖃᕋᑎᓪᓗ. ᓇᓗᓇᐃᖅᓯᒪᑦᑎᐊᓚᐅᓐᖏᒻᒪᑦ ᑲᓇᑕᐅᑉ ᒐᕙᒪᒃᑯᖏᑦ ᑕᐃᔅᓱᒪᓂ ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᖏᓐᓂ ᐱᑕᖃᕐᒪᖔᑖ. ᑕᒪᔅᓱᒥᖓ ᐅᑉᐱᕆᔭᖃᑦᑎᐊᖅᑐᖓ. ᐱᔾᔪᑎᖃᓗᐊᓚᐅᕐᒥᔪᑦ ᐅᖅᓱᐊᓗᓐᓂᒃ, ᒑᓯᓂᒃ ᐆᒻᒪᖅᑯᑎᔅᓴᓂᓪᓗ ᐱᕙᓪᓕᐊᑎᑦᑎᒍᒪᓪᓗᑎᒃ ᒪᓕᒐᖅᑎᒍ ᐱᔪᒪᓪᓗᑎᒃ. ᑲᓇᑕᒥ, ᐱᖃᓯᐅᔾᔨᓚᐅᕐᖓᑕ ᒪᓕᒐᖅᑎᒍᑦ ᓇᓂᓯᒍᒪᓪᓗᑎᒃ ᐃᖅᑲᖅᑐᐃᕕᒃᑯᑦ ᓲᕐᓗ 1973-ᖑᓚᐅᖅᓯᒪᔪᒥ ᑳᑐ ᐃᖅᑲᖅᑐᐃᕕᓕᐊᕈᔾᔨᓯᒪᑎᓪᓗᒍ ᐳᕆᑎᔅ ᑲᓚᒻᐱᐊᒥ, ᐃᖅᑲᖅᑐᐃᔨᕐᒧᐊᒃᑯᑦ ᑲᓇᑕᒥ ᐃᓕᓴᖅᓯᓚᐅᕐᖓᑕ ᐱᑕᖃᕐᓂᖏᓐᓂ ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᖏᓐᓂ ᐊᕕᑦᑐᖅᓯᒪᔪᒥ. ᐊᐅᓪᓚᖃᑕᐃᓐᓇᕆᐊᖃᓚᐅᖅᓯᒪᔪᖓ ᐃᖅᑲᓇᐃᔮᖅᑖᕆᓚᐅᖅᓯᒪᔭᓐᓄᑦ. ᐅᓂᒃᑳᕆᐊᖅᑐᖅᑐᖓ ᓄᓇᑖᕈᑎᐅᑉ ᐃᖏᕐᕋᓂᕆᓂᐊᖅᑕᖏᓐᓂ ᐃᓄᖁᑎᑦᑎᓐᓄᑦ.

ᓈᓴᐅᑎᒻᒪᕆᒻᒥ 5, ᔮᓐ ᐅᓂᒃᑳᖃᖅᑐᖅ ᓯᕗᓪᓕᖅᐹᒥ ᒪᕐᕉᓐᓂᒃ ᑐᔅᓯᕋᐅᑎᓕᐊᒥᓃᓐᓂᒃ ᓄᓇᑖᕈᑎᔅᓴᒧᑦ 1970-ᖏᓐᓂ. ᐅᓂᒃᑳᖃᕆᓪᓗᓂ ᑲᓇᑕᐅᑉ ᐱᖁᔭᖏᑦ ᐊᔾᔨᒌᐸᓗᓂᖏᓐᓂ ᑕᐃᓐᓇᓗ ᖃᓪᓗᓈᓄᑦ ᓴᓇᓯᒪᔪᖅ 1969-ᓕᓴᖅ. ᐅᓂᒃᑳᖃᕆᓪᓗᓂ ᐱᓕᕆᐊᖑᔪᓂᒃ ᐃᓄᐃᑦ ᑕᐱᕇᔅᓴᒃᑯᑦ ᑲᓇᑕᒥ ᑕᐃᔅᓱᒪᓂ ᐊᒻᒪᓗ ᑲᒪᒋᖃᑦᑕᓚᐅᖅᑕᖏᑦ: ᐊᓐᓂᐊᖅᑐᓕᕆᓂᖅ ᐃᓪᓗᓕᓂᕆᓂᕐᓗ, ᒪᓕᒐᐃᑦ ᓂᕐᔪᑎᓄᑦ ᒐᕙᒪᒃᑯᓪᓗ ᐱᖁᔭᖏᑦ ᐊᑐᐊᒐᖏᓐᓂᓪᓗ ᐅᓂᒃᑳᖃᖅᑐᓂ. ᐅᓂᒃᑳᖃᕆᓪᓗᓂᓗ ᐱᓕᕆᐊᕆᔭᕆᐊᓕᖏᓐᓂ ᑲᑐᔾᔨᖃᑎᒌᑦ. ᐊᐃᕙᒋᐊᓯᒻᒪᑕ, ᐃᓄᐃᑦ ᐊᐃᕙᔨᖏᑦ ᐊᑕᐅᓯᑐᐊᕐᒥᑦ ᒪᓕᒐᔅᓴᖃᓚᐅᖅᑐᑦ - ᐊᓛᔅᑲᒃᑯᑦ ᐃᓄᖏᓐᓄᑦ ᓄᓇᑖᕈᑎᔅᓴᖓᓐᓂ 1971-ᓕᓴᕐᒥᑦ - ᐊᒻᒪᓗ ᒐᕙᒪᒃᑯᑦ ᐱᖁᔭᖃᓚᐅᖅᓯᒪᓐᖏᒻᒪᑕ ᓄᓇᑖᕈᑎᔅᓴᓄᑦ. ᑕᐃᒪᐃᒃᑲᓗᐊᖅᑎᓪᓗᒍ, ᓇᓗᓇᐃᖅᓯᒪᑦᑎᐊᓚᐅᓐᖏᑦᑐᖅ ᐱᑕᖃᕐᓂᖓᓐᓂ ᓯᕗᓕᖅᑕ ᐱᔪᓐᓇᐅᑎᖏᓐᓂ. ᔮᓐ ᐅᓂᒃᑳᖃᕆᓪᓗᓂ ᐱᒻᒪᕆᐅᓂᖏᓐᓂ ᒪᓕᒐᖅᑎᒍᑦ ᐱᑕᖃᕆᐊᖃᕐᓂᖏᓐᓂ ᒐᕙᒪᒃᑯᑦ ᐱᔪᒪᓂᖓᓐᓂ ᐅᖃᖃᑎᒌᓪᓗᑎᒃ. ᐅᓂᒃᑳᖃᖅᑐᓂᓗ ᐊᐅᓚᖃᑦᑕᕐᓂᒥᓂᖓᓂ ᐅᓂᒃᑳᕆᐊᖅᑐᖅᑐᓂ ᓄᓇᑖᕈᑎᔅᓴᓂᒃ ᑲᓇᑕᒥᐅᑕᐃᑦ ᖃᓪᓗᓈᖏᓐᓄᑦ ᐊᒻᒪᓗ ᐃᓄᓐᓄᑦ, ᐱᓗᐊᖅᑐᒥᒃ ᖃᓪᓗᓈᑦ ᖃᓄᖅ ᑐᑭᖃᖅᑎᑦᑎᒻᒪᖔᑕ ᓇᒻᒥᓂᖃᕐᓂᕐᒥᑦ ᓄᓇᒥᑦ. ᐅᓂᒃᑳᖃᖅᑐᓂᓗ ᐱᑕᖃᕈᓐᓃᕐᓂᖏᓐᓂ ᓯᕗᓕᖏᑦᑕ ᐱᔪᓐᓇᐅᑎᖏᑦ, ᐱᔾᔪᑕᐅᓗᐊᖅᑐᖅ ᐅᓪᓗᒥ, ᒐᕙᒪᒃᑯᓪᓗ ᑕᐃᒪᐃᑎᑦᑎᒍᒪᓪᓚᕆᑦᑐᑎᒃ. ᓯᕗᓪᓕᖅᐹᖓᓐᓂ ᖃᓄᖅ ᐊᑐᖅᑕᐅᒋᐊᓯᓚᐅᕐᒪᖔᑕ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓄᓇᑖᕈᑎᓂᒃ, ᐊᒻᒪᓗ ᑕᐱᕇᔅᓴᒃᑯᑦ ᑭᔾᔪᓯᖏᑦ. ᐅᓂᒃᑳᖃᖅᑐᓂᓗ ᐊᔾᔨᒌᓐᖏᓐᓂᖏᓐᓂ ᐃᓄᐃᑦ ᑭᒡᒐᖅᑐᖅᑕᐅᓂᖏᑦ ᐊᐃᕙᔾᔪᑎᖃᖅᑎᓪᓗᒋᑦ. ᐱᒻᒪᕆᐅᓂᕋᐃᓪᓗᓂᓗ ᐃᓄᐃᑦ ᓄᓇᕗᓪᓗ ᑲᑎᓐᖓᒋᐊᖃᕐᓂᖏᓐᓂ ᒐᕙᒪᒃᑯᓐᓂ ᐸᖅᑭᔭᐅᒋᐊᖃᕐᓂᖏᓐᓂᓪᓗ ᐅᖃᐅᓯᖏᑦ ᐱᖅᑯᓯᖏᓐᓂᓪᓗ. ᐱᔭᕇᖅᑐᓂ ᐅᓂᒃᑳᖅᑐᓂ ᐊᔅᓱᕈᓐᓇᖃᑦᑕᓚᐅᖅᓯᒪᒻᒪᒡᒎ ᑐᑭᓯᓇᓱᐊᑦᑎᐊᖅᑐᒋᑦ ᐊᓪᓚᐃᑦ, ᑐᑭᓯᓇᓱᐊᑦᑎᐊᖅᑐᓂᓗ ᖃᓄᐃᑦᑐᓂᒃ ᐱᓕᕆᒻᒪᕆᒻᒪᖔᑕ ᐊᔾᔨᒌᐸᓗᒃᑲᓗᐊᖅᑎᓪᓗᒋᑦ.