!(^)-q8i: xy0pX9oxo3iz srs6b6g6

ᔮᓐ ᐊᒪᕈᐊᓕᒃ

ᐊᐅᓪᓚᕆᐊᖃᖅᑐᒋᓕᓚᐅᖅᓯᒪᕗᖓᓕ ᑕᐃᑲᓂ ᖃᐅᓱᐃᑦᑐᒥ, ᖃᐅᓱᐃᑦᑐᖅ ᑕᐃᔅᓱᒪᓂ ᖁᕕᐊᓇᓚᐅᖅᓯᒪᖏᓐᑦᑐᖅ, ᑕᐃᔅᓱᒪᓂ ᐅᖃᐅᓯᕆᖅᑲᐅᒐᒃᑯ. ᓄᓇᓕᕋᓛᖅᐹᓘᓪᓗᓂ ᐃᑉᐱᒍᓱᑲᒻᒪᑦᑐᑎᓪᓗ. ᐃᒥᖅᑐᐊᓘᓪᓗᑎᒃ, ᐱᐅᓚᐅᖅᓯᒪᓐᖏᑦᑎᐊᖅᑐᖅ. ᐅᓪᓗᒥᐅᓕᖅᑐᓪᓕ, ᖃᐅᓱᐃᑦᑐᖅ ᓄᓇᒋᓪᓗᒍ ᖁᕕᐊᓇᓐᓂᖅᓴᐅᓕᖅᑐᖅ. ᐃᒥᖅᑐᐊᓘᓐᖏᓂᖅᓴᐅᓕᖅᑐᑎᒃ. ᐃᓄᖏᑦ, ᐱᓗᐊᖅᑐᖅ ᓱᕈᓯᖏᑦ, ᑎᒥᒃᑯᑦ ᐃᓱᒪᒃᑯᓪᓗ ᐱᐅᓂᖅᓴᓪᓚᕆᐅᓕᖅᑐᖅ. ᓱᕈᓰᑦ ᐃᕐᖑᑕᖏᓪᓗ ᖁᑦᑎᑦᑐᒧᑦ ᐊᐅᓪᓛᖅᑕᐅᓯᒪᔪᓂᒃ ᓯᕗᒃᑲᖅᑕᐃᒋᐊᖅᓯᒪᓕᖅᑐᑦ ᓄᓇᓕᓐᓂᑦ. ᓄᓇᓕᕈᖅᑎᑕᐅᕙᓪᓕᐊᓪᓗᑎᒃ ᕼᐊᒻᒪᓚᖃᓕᖅᑐᑎᒃ.

ᓈᓴᐅᑎᒻᒪᕆᖓ 3, ᔮᓐ ᐅᓂᒃᑳᖃᖅᑐᖅ ᐊᓯᔾᔨᕐᓂᐅᓚᐅᖅᓯᒪᔪᓕᒫᓂᒃ ᐅᑭᐅᖅᑕᖅᑐᒥ 1960-ᖏᓐᓂ; ᑲᑉᐳᔭᖅᑐᕈᔪᐃᑦ ᓴᖅᑭᐸᓪᓕᐊᓂᖏᓐᓂ, ᑲᑎᒪᔨᑦᑖᖅᐸᓪᓕᐊᓂᖏᓐᓂ ᖃᐅᒪᐃᓪᓗ, ᓄᓇᑖᖅᐸᓪᓕᐊᓂᖏᑦ, ᒪᓕᒐᓕᐅᖅᑎᑖᖅᐸᓪᓕᐊᓂᖅ, ᑯᐊᐸᑖᖅᐸᓪᓕᐊᓂᖅ, ᐊᓯᔾᔨᕐᓂᖏᑦ ᐃᓄᐃᑦ ᐃᓪᓗᖏᑦ, ᐃᓕᓐᓂᐊᖅᑐᓕᕆᓂᖅ, ᓯᑭᑐᓪᓗ ᓴᖅᑭᐸᓪᓕᐊᓂᖏᑦ. ᑕᒪᒃᑯᐊᓕᒫ ᐊᓯᔾᔨᕈᑕᐅᓯᒪᔪᑦ ᐃᓄᓐᓄᑦ. ᐃᖅᑲᐅᒪᒻᒥᔪ ᓯᕗᓪᓕᖅᐹᒥ ᐃᖃᓗᓐᓅᕐᓂᕆᓚᐅᖅᓯᒪᔭᖓᓐᓂ ᐊᓯᔾᔨᐸᓪᓕᐊᓂᖓᓂᓗ ᓄᓇᓕᒃ. ᐅᓂᒃᑳᖃᖅᑐᓂᓗ ᐅᐊᑦᑎᐊᕈ ᒫᓐᓇᓗ ᐃᓅᓯᐅᔪᓂᒃ ᖃᐅᓱᐃᑦᑐᒥ. ᐅᓂᒃᑳᖅᑐᓂᓗ ᐅᑎᕐᓂᕆᓚᐅᖅᓯᒪᔭᖓᓐᓂ ᐃᓕᓐᓂᐊᕐᕕᒻᒧᑦ 1970-ᒥ. ᐅᓂᒃᑳᖃᕆᓪᓗᓂᓗ ᐃᖅᑲᓇᐃᔮᖅᑖᕐᓂᕆᓚᐅᖅᓯᒪᔭᖓᓂ ᒐᕙᒪᒃᑯᓐᓄᑦ ᐱᓕᒻᒪᔅᓴᓚᐅᖅᑐᓂ ᐃᓄᐃᑦ ᑕᐱᕇᔅᓴᒃᑯᑦ ᑲᓇᑕᒥ ᓄᓇᑖᕈᑎᔅᓴᒧᑦ. ᐊᔅᓱᕈᓐᓇᕐᓂᐅᓚᐅᖅᓯᒪᔪᒥᒃ ᐅᓂᒃᑳᖃᒃᑲᓐᓂᓕᕆᓪᓗᓂ - ᕿᒻᒦᔭᖅᑕᐅᓂᕆᓚᐅᖅᓯᒪᔭᖏᑦ, ᕿᒻᒥᑦ - ᑕᒪᓐᓇ ᐅᓪᓗᒥᒧᑦ ᐊᑦᑐᐃᒍᑕᐅᓯᒪᒻᒪᑦ ᐃᓄᓐᓄᑦ. ᐅᓂᒃᑳᖃᖅᑐᓂ ᖃᓄᖅ ᐊᑐᑎᖃᑦᑎᐊᓚᐅᖅᓯᒪᒻᒪᖔᑕ ᕿᒻᒦᑦ ᐃᓄᓐᓄᑦ ᖃᓄᕐᓗ ᐊᑦᑐᐃᓂᖃᕐᓂᕐᒪᖔᖅ ᕿᒻᒦᔭᖅᑕᐅᓚᐅᖅᑎᓪᓗᒋᑦ ᐊᓯᐊᓅᖅᑕᖏᓐᓂᖅᓴᐅᓕᖅᑐᑎᒃ. ᓯᕗᓪᓕᖅᐹᒥᓗ ᑐᓴᐅᒪᖃᑦᑕᐅᑎᓂᖅ ᑲᓇᑕᒥ ᐃᓄᖏᑦ ᐃᓄᐃᓪᓗ ᑲᑐᔾᔨᖃᑎᒌᑦ ᖃᓄᖅ ᓴᖅᑭᓂᕐᒪᖔᑕ. ᐅᓂᒃᑳᖃᖅᑐᓂ ᖃᓄᖅ ᐱᒻᒪᕆᐅᑎᒋᒻᒪᖔᑕ ᐊᑎᓕᐅᖅᓯᓂᖅ ᓯᕗᓪᓕᖅᐹᒥ ᐊᖏᕈᑎᒥᒃ ᐃᓄᓐᓂᒃ ᑕᐃᒃᑯᓄᖓ ᐃᓄᑉᐱᐊᓂᓪᓗ ᐊᓛᔅᑲᒥ ᖃᓄᕐᓗ ᐊᑦᑐᐃᓂᖃᕐᓂᒪᖔᖅ ᑲᓇᑕᐅᑉ ᐃᓄᖏᓐᓄᑦ, ᐊᒻᒪᓗ ᔭᐃᒻᔅ ᐸᐃ ᑯᐸᐃ ᑕᕐᕋᖓᓂᓗ ᐊᖏᕈᑎᖓᓐᓂ, ᓯᕗᓪᓕᖅᐹᒥ ᐊᖏᕈᑎᐅᓯᒪᔪᓂᒃ ᑲᓇᑕᒥ.