ᖃᖓᒃᑯᑦ ᑕᐃᒪᐃᖃᑦᑕᓚᐅᖅᓯᒪᓂᖏᑦ ᑲᓇᓐᓇᖓᓐᓂ ᐅᑭᐅᖅᑕᖅᑐᑉ
ᑎᑎᕋᖅᑕᐅᓯᒪᔪᑦ ᓗᐃ ᒪᒃᑲᒻᐳᒧᑦ ᐳᕌᓐᓱᐊ ᓚᕙᒃᒧᓪᓗ
ᑖᓐᓇ ᑕᐃᒪᓐᖓᓂᐊᓗᒃ ᖃᓄᐃᓐᓂᐅᖃᑦᑕᖅᑐᑦ ᑲᑎᒪᔨᐅᓂᒃᑯᑦ ᐋᖅᑭᑦᑕᐅᓚᕿᓯᒪᕗᖅ ᑲᓇᑕᐅᑉ ᐅᑭᐅᖅᑕᖅᑐᖓᓐᓂ. ᑎᓴᒪᐅᓕᖅᑲᖓᕗᑦ ᑖᒃᑯᐊ ᖃᓄᐃᓐᓂᐅᖃᑦᑕᖅᓯᒪᔪᑦ ᐃᒪᐃᑦᑐᓪᓗᑎᒃ:
- ᐃᓚᖏᑦ ᐱᒻᒪᕆᐅᔪᑦ ᐅᓪᓗᐃᑦ ᑲᓇᑕᐅᑉ ᑲᑎᒪᔨᐅᓂᕐᒧᑦ ᖃᓄᐃᖃᑦᑕᖅᓯᒪᓂᖏᓐ.
- ᐃᓚᖏᑦ ᐱᒻᒪᕆᐅᔪᑦ ᐱᕙᓪᓕᐊᓂᖏᓐᓂ ᑭᒡᒐᖅᑐᐃᔨᑦᑕᖃᖃᑦᑕᓕᖅᑎᓪᓗᒍ ᐊᐅᓚᑦᑎᓂᕐᒥᑦ ᓄᓇᑦᑎᐊᕐᒥ ᓄᓇᕗᒻᒥᓪᓗ.
- ᐃᓚᖏᑦ ᐱᒻᒪᕆᐅᔪᑦ ᐅᓪᓗᐃᑦ ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᑖᕐᓂᖏᓐᓂ ᑲᓇᑕᒥ.
- ᐃᓚᖏᑦ ᐱᒻᒪᕆᐅᔪᑦ ᐅᓪᓗᐃᑦ ᐃᓛᒃᑰᓕᖅᑎᑕᐅᕙᓪᓕᐊᓂᖓᓐᓂ ᓄᓇᑦᑎᐊᕐᒥ.
1576: ᒫᑕᓐ ᐳᕉᐱᓱ ᕿᒥᕐᕈᒋᐊᓚᐅᖅᓯᒪᕗᖅ ᑲᓇᓐᓇᖅᐸᓯᖓᓐᓄᑦ ᕿᑭᖅᑖᓘᑉ. ᓯᕗᓪᓕᖅᐹᖑᓪᓗᓂ ᑕᕆᐅᑉ ᐊᑭᐊᖓᓃᓐᖔᖅᓯᒪᔪᖅ ᑐᓚᐅᖅᓯᒪᕗᖅ ᑕᒪᐅᖓ ᑕᐃᒪᐃᓐᓂᖓᓐᓄᑦ ᐊᑎᖃᓕᖅᑯᖅ ᐅᐸᒋᐊᓐᖓᓚᐅᖅᓯᒪᔭᖓ.
1670: ᑭᖕ ᓵᕈᔅ ᐊᐃᑉᐸᖓ ᐃᖓᓚᒻᒥ ᑐᓂᓯᓚᐅᖅᓯᒪᕗᖅ ᐃᓪᓗᐊᕐᔪᖓᓐᓄᑦ ᐳᕆᓐᔅ ᕉᐳᑦᒥᑦ ᑰᑦᑐᓕᒫᑦᑎᐊᕐᓂᑦ ᑲᖏᖅᑐᐊᓘᑉ ᐃᒪᖓᓐᓄᑦ, ᓴᓇᓚᐅᕐᓂᖓᓐᓄᑦ ᑕᐅᖅᓰᕕᒻᒥᑦ ᐊᒥᕐᓂᑦ ᑲᓇᑕᒥ. ᑖᓐᓇ ᖃᐅᔨᒪᔭᐅᓕᖅᑐᖅ ᐅᓪᓗᒥ ᕉᐳᑦ ᓄᓇᖓᓂ. ᑲᒪᓚᐅᖅᓯᒪᒻᒪᑦ ᑕᐅᖅᓰᕕᒻᒥᑦ ᕉᐳᑦ ᓄᓇᖓᓐᓂ, “ᒐᕙᓄ ᑲᒻᒪᓂᐅᔪᕐᓗ ᐊᐅᓪᓚᐸᑦᑐᓂᒃ ᐃᖓᓚᒥ ᑕᐅᖅᓰᔨᒃᑯᓐᓄᑦ” (ᓂᐅᕕᖅᑎᒃᑯᑦ) ᑎᒥᕈᖅᑎᑕᐅᓚᐅᖅᓯᒪᔪᖅ ᕈᐃᔪᒃᑯᓐᓄᑦ.
1763: ᕈᐃᔪᒃᑯᑦ ᓇᓗᓇᐃᖅᓯᓚᐅᖅᓯᒪᔪᑦ ᓄᓇᖃᖅᑳᖅᑐᒥᓂᕐᓄᑦ ᐱᔪᓐᓇᐅᑎᖃᕆᐊᖃᕐᓂᖏᓐᓂ ᓄᓇᓂᒃ, ᓄᑖᖅ ᐅᐃᕖᑦ ᓄᓇᖓᓐᓂ ᑐᓂᒻᒪᑕ ᓇᒻᒥᓂᖅ ᐳᕆᑎᔅᑯᓐᓄᑦ ᐊᖏᕈᑎᓕᐅᖅᑐᑎᒃ ᐸᕇᔅᒥ. ᓚᓐᑕᓐ ᐃᑲᔪᖅᑕᐅᒋᐊᖃᓚᐅᖅᓯᒪᒻᒪᑕ ᐅᓇᓕᖏᑦ ᓄᓇᖃᖅᑳᖅᑐᒥᓂᕐᓂᑦ ᑎᒍᔭᐅᕋᑖᖅᑲᐅᔪᒧᑦ ᓄᓇᕐᔪᐊᕐᒥᑦ ᐊᓚᓂᐊᓕᖅᑕᖓᓂ ᐃᖓᓚᐅᖃᑕᐅᓕᕐᓗᓂ.
1775: ᒥᐊᓕᒐᐃᑦ ᐅᓇᑕᖅᑎᐊᓗᖏᑦ ᑲᓇᑕᒨᖅᐸᓪᓕᐊᕗᑦ. ᓯᕗᓪᓕᖅᐹᒥ ᒥᐊᓕᒐᐃᑦ ᐃᓃᖅᓱᓇᓱᐊᓚᐅᖅᓯᒪᔪᑦ ᒪᓐᑐᕆᐊᒥ ᑲᐸᒻᒥᓪᓗ.
1811: ᓂᐅᕕᖅᑎᒃᑯᑦ ᑐᓂᓯᓚᐅᖅᓯᒪᔪᑦ ᑖᒪᔅ ᑕᑭᓚᔅᒥ, ᑕᓪᓕᒪᖓᓐᓂ ᐆᕈ ᑭᐅᑯᒃᑯᓐᓂ, 300,000 ᑭᓚᒦᑕᓂᒃ ᓄᓇᒥᑦ ᐅᐃᓂᐹᒥ (ᒫᓐᓇ ᒫᓂᑐᐸᐅᓕᖅᑐᖅ ᓄᐊᑦ ᑎᑰᑕᐅᓪᓗᓂᓗ).
1812: ᐊᐃᑉᐱᓚᐅᖅᓯᒪᔪᖅ ᒥᐊᓕᒐᕐᓂᑦ ᐃᓃᖅᓯᓇᓱᐊᖅᑐᒥᑦ ᑲᓇᑕᒥ.
1812: ᑖᒪᔅ ᓯᐅᒃᑯ ᖃᐅᔨᖅᑳᓚᐅᖅᓯᒪᕗᖅ ᕋᑦ ᕆᕗᒥᑦ, ᐊᑦᑎᖅᑐᓂᐅᒃ ᐊᓯᓂᐳᐊ. ᐊᑯᓐᓂᖏᓐᓂ 1812 1815-ᓗ, 300 ᓯᒃᑳᑦᑏᑦ ᐊᐃᕆᔅᓗ ᐃᓂᑖᓚᐅᖅᓯᒪᕗᑦ ᑕᐃᑲᓂ.
1817: ᑖᒪᔅ ᓯᐅᒃᑯ ᐊᑎᓕᐅᖃᑎᖃᓚᐅᖅᓯᒪᔪᖅ ᐊᓪᓚᓂᒃ ᐊᖏᕈᑎᒥᒃ ᐅᐊᓐᓇᖅᐸᓯᖓᓐᓂ ᑲᓇᑕᐅᑉ. ᐱᑎᑉᐸᑦᑐᓂᒋᑦ 100-ᐸᐅᓂᒃ ᑕᕝᕚᑲᓂᑦ ᐊᕐᕌᒍᑕᒫᑦ, ᐃᖅᑯᓖᑦ ᐱᔪᓐᓇᐅᑎᒥᓂᒃ ᑐᓂᓯᒪᐅᖅᓯᒪᔪᑦ ᐃᓚᖓᓐᓂ ᓄᓇᒥᑦ ᑕᐃᑲᓂ ᕋᑦᒥ ᐊᓯᓂᐳᐊᓗ ᑰᖓᓐᓂ, ᑭᓪᓕᑖᖅᑎᑕᐅᓯᒪᓕᕆᓪᓗᑎᒃ ᐊᓯᖏᓐᓄᑦ ᐊᑐᖅᑕᐅᓂᐊᕐᖓᑕ.
1820: ᑖᒪᔅ ᓯᐅᒃᑯ ᑐᖁᓪᓗᓂ. ᑐᖁᑦᑎᖓ ᐋᖅᑮᓕᓚᐅᖅᑐᖅ ᐊᑐᐃᓐᓇᐅᓂᖅᓴᐅᓕᖅᑎᑦᑐᓂᐅᒃ ᐊᑭᓕᖅᓱᕆᐊᓖᓪᓗ ᖃᑦᑏᓐᓇᕈᖅᐹᓪᓕᑎᖅᑐᓂᒋᑦ ᓄᖅᑲᑎᑦᑐᒋᑦ ᐃᑲᔫᑏᑦ ᐊᓯᖏᓐᓂᓪᓗ ᐃᖅᑲᓇᐃᔭᖅᑎᑖᕋᓂ ᑕᕆᐅᑉ ᐊᑭᐊᓃᑦᑐᓂᒃ. ᑕᐃᒪᐃᓐᓂᖓᓐᓄᑦ ᑕᒪᓐᓇ ᒪᑐᐃᖓᓂᖅᓴᐅᓕᓚᐅᖅᑯᖅ ᒥᐊᓕᒐᕐᓄᑦ ᐃᓂᓯᒍᒪᔪᓄᑦ.
1820-1840: ᐃᖓᓚᒥᐅᑦ ᐊᕐᕙᓂᐊᖅᑏᑦ ᕿᑭᖅᑖᓘᑉ ᐃᒪᖓᓐᓅᕋᔪᖃᑦᑕᓚᐅᖅᑐᖅ, ᓴᓐᓂᕈᑎᐅᑉ ᐃᒪᖓᓐᓄᑦ, ᑕᓪᓗᕈᑎᐅᑉ ᐃᒪᖓᓐᓄᓪᓗ. ᐃᓄᐃᑦ ᑕᑯᒋᐅᓕᓚᐅᖅᓯᒪᕗᑦ ᑕᕆᐅᑉ ᐊᑭᐊᓂᒥᐅᑦ ᓱᓇᒃᑯᑖᖏᓐᓂ.
1821-1823: ᐅᐃᓕᐊᒻ ᐱᐅᕆ ᔪᐊᔾᔨ ᓚᐃᐊᓐᓗ ᓯᕗᓪᓕᖅᐸᖑᓪᓗᑎᒃ ᐅᑭᐊᓪᓕᓚᐅᖅᓯᒪᔫᒃ ᐅᑭᐅᖅᑕᖅᑐᒥ. ᑖᓐᓇ ᐅᐃᓐᑐ ᕿᑭᖅᑕᖓᓃᑦᑐᑦ (Winter Island), ᖃᓂᒋᔭᖓᓂ ᐃᒡᓗᓕᒻᒥ.
1821: ᓂᐅᕕᖅᑎᒃᑯᑦ ᐊᒥᓱᐊᓗᓐᓂᒃ ᐃᖅᑲᓇᐃᔭᖅᑎᖏᓐᓂ ᓄᖅᑲᑎᑦᑎᓚᐅᖅᓯᒪᔪᑦ. ᐊᒥᓱᑦ ᑕᒪᐅᓐᖓᖅᓯᒪᔪᑦ ᐃᓱᒪᖅᓱᖅᑐᑎᒃ ᐃᓚᒋᓐᓃᓕᓚᐅᖅᓯᒪᔪᑦ ᐊᓯᓂᐳᐊᒥ. ᑕᐃᒃᑯᐊ ᐃᖅᑭᓖᑦ, ᑕᐃᒃᑯᐊ ᐃᓚᒋᔭᐅᖃᑕᐅᓕᖅᑐᑎᒃ ᐃᓄᒋᐊᔅᓯᑲᓐᓂᓚᐅᖅᓯᒪᔪᑦ.
1836: ᓯᐅᒃᑯᑦ ᐃᓚᒌᑦ ᑲᒪᖔᓕᓚᐅᖅᓯᒪᔪᑦ ᓂᐅᕕᖅᑎᑯᓐᓂ ᑕᐃᑲᓐᖓᑦ ᐊᓯᓂᐳᐊᒥᑦ.
1837: ᑕᐃᒃᑯᐊ ᐊᓯᔾᔩᓇᓱᐊᖅᑏᑦ 1837-ᒥ ᐊᑦᑎᑦᑐᒥ ᖁᑦᑎᓂᖅᓴᒥᓪᓗ ᑲᓇᑕᒦᓚᐅᖅᓯᒪᔪᑦ. ᐊᑦᑎᓂᖅᓴᒥ ᑲᓇᑕᒥ, ᐅᐃᕖᑦ ᖃᓪᓗᓈᓪᓗ ᑲᓇᑕᒥᐅᑦ ᓵᓚᖃᕋᓱᐊᓚᐅᖅᑐᑦ ᐃᓚᒌᑦ ᐊᑦᑐᖅᑕᐅᓂᖏᓐᓄᑦ, ᐱᐅᖅᓱᐊᑏᑦ ᖁᑦᑎᓂᖅᓴᒦᑦᑐᑦ ᑲᓇᑕᒥ.
1840: ᐱᒋᐊᕐᓂᕆᓚᐅᖅᓯᒪᔭᖏᑦ ᓄᖅᑲᑎᑦᑎᓪᓗᑎᒃ ᒪᓕᒐᐅᔪᓂᒃ ᐊᑦᑎᑦᑐᒥ ᖁᑦᑎᑦᑐᒥᓪᓗ ᑲᓇᑕᒥ; ᐊᑐᓕᖁᔨᓚᐅᖅᓯᒪᔪᖅ ᐊᖏᔪᖅᑳᕐᔪᐊᖅ ᑐᕼᐊᒻ ᐅᓂᒃᑳᓕᐊᖓᓐᓄᑦ ᑯᐃᑉ ᑭᒡᒐᖅᑐᐃᔨᖓᓐᓄᑦ ᐱᒋᐊᓚᐅᖅᑎᓪᓗᒋᑦ 1837-ᒥ. ᓄᑖᕐᓂᑦ ᑭᖑᕐᕕᑦᑕᐅᓪᓗᑎᒃ ᑎᒥᐅᔪᒧᑦ, ᐊᕕᑦᑐᖅᓯᒪᔪᒥ ᑲᓇᑕᒥ. ᑭᓯᐊᓂᓕ ᑲᓇᓐᓇᖓᓂ ᑲᓇᑕᐅᑉ (ᐊᑦᑎᓂᖅᓴᐅᓚᐅᖅᓯᒪᔪᖅ ᑲᓇᑕᒥ) ᐃᓄᒋᐊᓐᓂᖃᓚᐅᖅᓯᒪᔪᖅ 650,000-ᓂᒃ, ᑭᒡᒐᖅᑐᖅᑕᐅᓪᓗᑎᒃ 42-ᓄᑦ ᓄᑖᕐᒥ ᒪᓕᒐᓕᐅᕐᕕᕐᔪᐊᒥ, ᑕᐃᒫᑦᑕᐅ ᑲᓇᑕᐅᑉ ᐅᐊᓕᓂᖓᓄᑦ (ᖁᑦᑎᓂᖅᓴᐅᓚᐅᖅᓯᒪᔪᖅ ᑲᓇᑕᒥ) ᐃᓄᒋᐊᓐᓂᖃᖅᑐᑎᒃ 450,000-ᓂᒃ. ᑕᒪᓐᓇ ᖁᑦᑎᓂᖅᓴᖅ ᑲᓇᑕᒥ ᑲᑎᓯᓕᓚᐅᖅᓯᒪᔪᖅ ᐊᑦᑎᓂᖅᓴᐅᔪᓂᒃ ᑲᓇᑕᒥ.
1840-1900s: ᐃᖓᓚᒥᐅᑦ ᐊᕐᕙᓂᐊᖅᑎᖏᑦ ᑲᖏᖅᑐᐊᓗᒻᒨᕋᔪᖃᑦᑕᓚᐅᖅᓯᒪᔪᑦ. ᒪᕐᕉᓐᓂᒃ ᐊᕐᕕᓂᐊᕐᕕᖃᓕᖅᑐᑎᒃ, ᓯᕗᓪᓕᖅ ᕿᑭᖅᑕᓃᑦᑐᓂ ᐊᐃᑉᐸᖓ ᐆᒻᒪᓇᕐᔪᐊᒦᑦᑐᓂ. ᑕᐃᑲᓐᖓᑦ 1851-ᖑᑎᓪᓗᒍ ᑕᐃᑯᖓ 1879-ᒧᑦ, ᐊᕐᕕᓂᐊᖅᑏᑦ ᑎᑭᒐᔪᖃᑦᑕᓚᐅᖅᓯᒪᔪᑦ.
1845-1848: ᐊᖏᔪᖅᑳᖅ ᔮᓐ ᐳᕌᓐᑭᓕᓐ ᓯᕗᒃᑲᖅᑕᐃᓚᐅᖅᓯᒪᔪᖅ ᖃᐅᔨᔭᖅᑐᖅᑐᑎᒃ ᐅᑭᐅᖅᑕᖅᑐᒥ ᐊᖅᑯᑕᐅᖃᑦᑕᕐᓂᐊᓕᖅᑐᒥᒃ. 1846-ᖑᑎᓪᓗᒍ ᒪᕐᕉᒃ ᐅᒥᐊᕐᔪᐊᒃ ᓯᕗᒃᑲᑕᖅᑕᖏᑦ, ᐃᕆᐸᔅ ᑎᐅᕈᓗ, ᓯᑯᒦᑐᐃᓐᓇᓕᒪᐅᖅᓯᒪᔫᒃ ᕕᒃᑐᐊᕆᔭᐅᑉ ᐃᒪᖓᓐᓂ. 1847-ᖑᓕᖅᑎᓪᓗᒍ ᐳᕌᓐᑭᓕ ᑐᖁᓚᐅᖅᓯᒪᔪᑦ 1848-ᒥ ᐅᒥᐊᕐᔪᐊᒥᐅᑕᓕᒫᑦ ᑐᖁᕋᓚᐅᖅᓯᒪᔪᑦ. 1848-ᒥ, ᐸᖅᓴᐃᔪᖃᓕᓚᐅᖅᓯᒪᔪᖅ ᐳᕌᓐᑭᓕᒃᑯᓐᓂ. ᐊᕙᑎᑦ ᐊᕐᕌᒍᑦ ᐊᓂᒍᖅᑎᓪᓗᒋᑦ, ᐊᒥᓱᑦ ᒥᐊᓕᒐᐃᑦ ᐳᕆᑎᔅᒥᐅᑕᓪᓗ ᐅᑭᐅᖅᑕᖅᑐᒨᖃᑦᑕᓕᓚᐅᖅᓯᒪᔪᑦ ᕿᓂᕆᐊᖅᑐᑎᒃ ᐳᕌᓐᑭᓕᐅᑉ ᐅᒥᐊᕐᔪᐊᒥᓂᖓᓂ.
1860-1915: ᒥᐊᓕᖓᐃᑦ ᐊᕐᕙᓂᐊᖅᑎᖏᑦ ᐃᑲᕐᕋᒨᕋᔪᖃᑦᑕᓚᐅᖅᑐᑦ ᐱᖓᓐᓇᖅᐸᓯᖓᓐᓂ ᑲᖏᖅᓱᐊᓘᑉ ᐃᒪᖓᓐᓂ. ᐊᕐᕙᓂᐊᖅᑏᑦ ᐅᑭᐊᓪᓕᓚᐅᖅᓯᒪᔪᑦ ᑕᐃᑲᓂ.
1864-1869: ᓵᕈᔅ ᐳᕌᓐᓴᔅ ᕼᐊᓪ, ᐊᒥᓕᒐᕐᓃᓐᖔᖅᓯᒪᔪᖅ, ᐅᑭᐅᒐᓚᓐᓂᒃ ᓇᐅᔮᓃᓚᐅᖅᓯᒪᔪᑦ. ᓂᕿᕆᐊᕋᓱᐊᓚᐅᖅᓯᒪᔪᖅ ᐊᖏᔪᖅᑳᒥᓂᐅᑉ ᔮᓐ ᐳᕌᓐᑭᓕᓐ ᐅᒥᐊᕐᔪᐊᖓᓂ. ᓯᕗᓪᓕᖅᐹᖑᓪᓗᓂ ᖃᐅᔨᓚᐅᖅᓯᒪᔪᖅ ᖃᓄᖅ ᐃᓅᓇᓱᐊᖃᑦᑕᓂᕐᒪᖔᑕ ᓄᓇᒥᑦ ᓂᕿᖃᖅᑐᑎᒃ ᐃᓄᓐᓂᓪᓗ.
1867: ᑲᓇᑕᐅᑉ ᑲᑎᒪᔨᖏᑦ. ᐳᕆᑎᔅ ᓄᐊᑦ ᒥᐊᓕᒐᐃᑦ ᐱᖁᔭᖏᑦ ᓴᖅᑭᖅᑕᐅᓚᐅᖅᓯᒪᔪᑦ ᑕᒥᓐᓂᐊᓐᒥᑦ ᑲᓇᑕᒥ ᑎᓴᒪᐅᓕᖅᑲᖓᓪᓗᑎᒃ (ᓅ ᐳᕌᓐᓱᐃᒃ, ᓅᕕᔅ ᑰᓴ, ᐊᓐᑎᐅᕆᔪ, ᑯᐸᓪᓗ). ᐃᖓᓚᒃᑯᑦ ᑲᔪᓯᑎᑦᑎᓪᓗᑎᒃ ᒪᓕᒐᕐᓂᑦ ᑲᒪᓂᐊᓕᖅᑐᓂᒃ ᓄᓇᖃᖅᑳᖅᑐᒥᓂᕐᓂᑦ ᑕᐃᑲᓂ ᓄᑖᕐᒥ ᒐᕙᒪᐅᓕᖅᑐᒥᑦ.
1869: ᓂᐅᕕᖅᑎᒃᑯᑦ ᐊᐅᓪᓛᖅᓯᓚᐅᖅᓯᒪᔪᑦ ᕉᐳᑦ ᓄᓇᖓᓐᓂ ᐅᑎᖅᑎᑕᐅᓪᓗᓂ ᓄᑖᕐᒧᑦ ᑕᒥᓂᐊᓐᒧᑦ ᑲᓇᑕᒥ.
1869: ᐊᕕᑦᑐᖅᓯᒪᔪᓕᒫᓐᓂᒃ ᐊᐅᓚᑕᐅᒻᒪᑕ ᓂᐅᕕᖅᑐᑯᓐᓄᑦᑕᐅ, ᐊᓯᓂᐳᐊ ᐊᐅᓪᓛᖅᑕᐅᓪᓗᓂ ᑕᒥᓐᓂᐊᒧᑦ ᑲᓇᑕᒥ. ᓗᐃ ᕆᐅᓪ ᐊᓯᖏᓪᓗ ᐃᖅᑭᓖᑦ ᓯᕗᓕᖅᑏᑦ ᓴᖅᑮᓚᐅᖅᓯᒪᔪᑦ ᐃᖅᑭᓕᓐᓄᑦ ᒐᕙᒪᐅᓂᐊᓕᖅᑐᒥᑦ. ᑕᒪᓐᓇ ᑭᒡᒐᖅᑐᐃᓂᖅ ᒐᕙᒪᐅᔪᒥᑦ ᐊᐃᕙᔾᔪᑕᐅᓂᐊᓕᖅᑐᒥᑦ ᑲᓇᑕᒥ ᐱᔾᔪᑎᒋᓪᓗᒋᑦ ᐊᓯᓂᐳᐊ ᑲᑎᒪᔨᕈᕐᓂᐊᓕᖅᑐᑎᒃ. ᑭᓯᐊᓂᓕ ᕆᐅᓪ ᐸᓯᔭᐅᓚᐅᖅᑐᖅ ᑲᑎᒪᔨᓄᑦ ᐋᑐᕚᒥ ᐱᑦᑎᐊᖏᓐᓂᒥᓂᖓᓐᓄᑦ, ᐃᓕᓴᖅᓯᓕᓚᐅᖅᑐᑦ ᐱᔪᓐᓇᐅᑎᖏᓐᓂ ᐃᓄᓐᓂᒃ ᕋᑦ ᕆᕗᒥ. ᑕᒪᓐᓇ ᐃᓕᓴᖅᓯᓂᐅᔪᖅ ᓴᖅᑮᔾᔪᑎᖃᓕᓚᐅᖅᑐᖅ ᒫᓂᑐᐸ ᐱᖁᔭᖓᓐᓂ. ᕆᐅᓪ ᕿᒪᔅᓯᓐᓂᓚᐅᖅᓯᒪᔪᖅ ᒥᐊᓕᒐᐃᑦ ᓄᓇᖓᓐᓄᑦ.
1870: ᒫᓂᑐᐸ ᐱᖁᔭᖓ ᑲᔪᓯᑎᑕᐅᓪᓗᓂ, ᓄᑖᕐᒥᓪᓗ ᓴᖅᑮᓪᓗᑎᒃ ᐃᖅᑭᓕᓄᑦ ᓄᓇᒥᑦ. ᐱᖁᔭᖅ ᐸᖅᑭᑦᑎᓚᐅᖅᑐᑦ ᐱᔪᓐᓇᐅᑎᖏᓐᓂ ᐅᐃᕖᑦ ᐃᔅᓯᕋᕐᔪᐊᖏᓐᓂ ᐃᖅᑭᓕᓂᑦ ᑕᐃᑲᓃᒍᓐᓇᖁᓪᓗᒋᑦ ᐱᖅᑯᓯᖏᑦ ᒪᓕᓪᓗᒋᑦ, ᐅᖃᐅᓯᖏᓐᓂᓗ ᐊᑐᕐᓗᑎᒃ ᐅᑉᐱᕐᓂᖏᓐᓂᓪᓗ, ᓄᑖᕐᒥ ᐃᓕᓴᕆᔭᐅᓕᖅᑐᒥᑦ. ᐅᑭᐅᓂᒃ 15-ᓂᒃ, ᑕᒪᒃᑯᐊ ᐱᔪᓐᓇᐅᑏᑦ ᒪᓕᑦᑕᐅᓚᐅᓐᖏᑦᑎᐊᖅᑯᑦ ᐊᕕᑦᑐᖅᓯᒪᔪᓂᒃ ᑲᒪᔪᓂᒃ ᐱᖁᓄᑦ.
1870: ᓴᖅᑭᖅᑕᐅᓪᓗᓂ ᓄᓇᑦᑎᐊᖅ, ᑲᓇᑕᒥ ᑕᒥᓐᓂᐊᖑᓪᓗᓂ ᐃᓇᖐᓪᓗᓂ ᕉᐳᑦ ᓄᓇᖓᓐᓂ. ᓂᐅᕕᖅᑎᒃᑯᑦ 120-ᓂᒃ ᓂᐅᕕᕐᕕᖃᓚᐅᖅᑐᑦ ᑕᒫᓂ ᐊᕕᑦᑐᖅᓯᒪᔪᓂᒃ ᐅᑭᐅᖅᑕᖅᑐᒥ.
1872: ᐃᖅᑭᓖᑦ ᐊᓯᓂᐳᐊᒦᑦᑐᒥᓃᑦ ᐊᐅᓪᓛᖅᑎᑕᐅᓚᐅᖅᓯᒪᔪᑦ ᐱᔪᒪᑎᓐᓇᒋᑦ ᐊᓐᑎᐅᕆᔪᒥᐅᑕᕐᓄᑦ ᒫᓂᑐᐸᒥ ᑕᐅᕗᖓ ᐅᐊᓐᓇᓄᑦ ᐊᐅᓪᓛᖅᑕᐅᓪᓗᑎᒃ. ᓄᑖᕐᒥᑦ ᓴᖅᑮᓕᓚᐅᖅᓯᒪᒻᒥᔪᑦ ᓇᔪᕐᓂᐊᖅᑕᖓᓐᓂ ᐊᑎᖃᖅᑐᒥᑦ ᐹᑐᑦᒥ ᓴᓇᑳᑦᓱᐊ ᑰᖓᑕ ᓂᒋᐊᓂ.
1876: ᐅᓇᑕᕐᓂᕆᓚᐅᖅᓯᒪᔭᖓ ᐱᕼᐅᐊᓐ. ᐅᓇᓖᑦ ᐊᓪᓚᐃᑦ ᒪᕐᕉᓕᖅᑲᖓᔫᒃ ᐊᖏᔪᖅᑳᖃᖅᑐᑎᒃ ᑯᕋᐃᓯ ᕼᐅᐊᔅᒧᑦ ᓵᓚᖃᓚᐅᖅᓯᒪᔪᑦ 7-ᖓᓐᓂ ᒥᐊᓕᒐᕐᓂᑦ ᐊᖏᔪᖅᑳᖃᖅᑐᓂᒃ ᐊᖏᔪᖅᑳᒻᒪᕆᖓᓐᓂ ᔪᐊᔾᔨ ᑲᔅᑐᒥᑦ.
1876: ᑕᒪᓐᓇ ᓴᖅᑭᓚᐅᖅᓯᒪᔪᖅ “ᐱᖁᔭᖅ ᐊᓪᓚᓅᖓᔪᖅ”, ᖃᐅᔨᒪᔭᐅᒻᒥᔪᖅ ᐊᓪᓚᓄᑦ ᐱᖁᔭᖅ. ᑲᓇᑕᒥᐅᑦ ᐊᓪᓚᐃᑦ ᐊᑎᓕᐅᖅᓯᒪᔪᑦ ᐊᓪᓚᐅᓪᓗᑎᒃ ᐱᖃᓯᐅᑎᓯᒪᓪᓗᑎᒃ ᐊᖏᕈᑎᖏᓐᓂ.
1880 : ᐳᕆᑕᒥ ᑐᓂᓯᓚᐅᖅᓯᒪᔪᑦ ᑯᐃ ᐃᓕᓴᐱᐅᑉ ᕿᑭᖅᑕᖏᓐᓂ ᑕᒥᓐᓂᐊᒧᑦ ᑲᓇᑕᒥ.
1885: ᐱᖓᓐᓇᖅᐸᓯᖓᓐᓂ ᐊᓯᔾᔩᓇᓱᐊᖅᑏᑦ. ᓯᕗᓕᖅᑎᖃᖅᑐᑎᒃ ᓗᐃ ᕆᐅᒻ, ᐅᑎᖅᓯᒪᓕᖅᑎᓗᒍ ᑲᓇᑕᒥ, ᐊᒻᒪᓗ ᒋᐳᕆᐅᓪ ᑐᒫᓐᑦ, ᐸᑕᔅ ᐃᖅᑭᓕᓂᒃ ᓴᖅᑮᓚᐅᖅᓯᒪᔪᑦ ᓇᒻᒥᓂᖅᓱᕐᓂᐊᖅᑐᓂᒃ (ᒐᕙᒪᐅᔪᓂᒃ ᓴᔅᑳᑦᓱᐊᒥ). ᑐᒫᑦ ᓵᓚᖃᓚᐅᖅᑎᓪᓗᒍ ᐱᖓᓐᓇᖅᐸᓯᖓᓐᓃᑦᑐᓂᒃ ᐸᓖᓯᓂᒃ ᐅᓇᑕᖅᑎᓪᓗᒋᑦ ᑕᒃ ᑕᓯᖓᓐᓂ, ᒐᕙᒪᑐᖃᒃᑯᑦ ᐊᐅᓪᓚᑎᑦᑎᒍᒪᓕᓚᐅᖅᓯᒪᔪᑦ 3,000ᔾᓂᒃ ᐅᓇᓕᓐᓂᑦ ᑎᓕᔭᐅᓯᒪᓪᓗᓂ ᐊᖏᔪᖅᑳᒻᒪᕆᖓᓐᓄᑦ ᔭᓄᕈᒧᑦ ᐳᕋᑐᕆᒃ ᒥᑐᑕᒧᑦ. 2,000 ᐃᑲᔪᕆᐊᓚᐅᖅᓯᒪᔪᑦ ᒥᑐᑕᒧᑦ. ᑕᒫᓂ ᒪᐃ 5-ᒥ ᐊᒻᒪᓗ ᒪᐃ 12-ᒥ, ᒥᑐᑕᓐ ᐃᖅᑭᓖᓪᓗ ᐅᓇᑕᓚᐅᖅᓯᒪᔪᑦ ᐸᑕᔅᒥ. ᒪᐃ 12-ᒥ, ᐃᖅᑭᓖᑦ ᐊᓪᓚᐃᓪᓗ ᓵᓚᒋᔭᐅᓗᑎᑦ ᑭᓯᐊᓂᐅᓕᓚᐅᖅᓯᒪᔪᖅ. ᒪᐃ 15-ᒥ, ᕆᐅᓪ ᑎᒍᔭᐅᓚᐅᖅᓯᒪᔪᖅ, ᑕᖃᓪᓗᓂ, ᐸᓯᔭᔅᓴᐅᓕᖅᑐᓂ ᐱᕋᔭᓐᓂᒥᓂᖓᓐᓄᑦ. ᑐᖁᑕᐅᓪᓗᓂ. ᒐᐃᐱᕈ ᑐᒫᓐ ᕿᒪᔅᓯᓚᐅᖅᓯᒪᔪᖅ ᒥᐊᓕᒐᐅᑉ ᓄᓇᖓᓐᓄᑦ. ᔪᓚᐃᒥ, ᐸᐅᓐᒪᐃᑯ ᐱᒃ ᐱᐅᓗ, ᒪᕐᕉᒃ ᐊᖏᔪᖅᑳᒃ ᐊᓪᓚᖓᔪᓄᑦ ᐃᑲᔪᖅᑐᐃᓚᐅᖅᓯᒪᔫᒃ ᐃᖅᑭᓕᓐᓂᒃ ᐅᓇᑕᖅᑎᓪᓗᒍ, ᓵᓚᐅᓚᐅᖅᓯᒪᔪᑦ.
1894: ᓴᖅᑭᖅᑕᐅᓚᐅᖅᓯᒪᔪᖅ ᐋᖏᓕᑲᒃᑯᑦ ᐅᒻᒪᓇᕐᔪᐊᕐᒥ ᑲᖏᖅᑐᐊᓗᒻᒥ ᐊᔪᕆᖅᓱᐃᔨᒧᑦ ᐃᐊᑦᒪᓐ ᓯᕿᓐᓂᕐᒥᐅᓂᑦ
1898: ᑲᓛᓐᑕᐃᒃ ᒎᓗᓯᐅᕐᓂᖅ ᐱᒋᐊᖅᑐᓂ. ᔫᑳᒥ ᓄᓇᑦᑎᐊᒦᓕᕐᓂᖓᓐᓂ ᓇᓗᓇᐃᖅᑕᐅᓚᐅᖅᓯᒪᔪᖅ. ᐊᑎᓕᐅᕆᓪᓗᑎᒃ ᐊᖏᕈᑎᒥᒃ 8-ᒥᑦ ᐋᑕᐹᔅᑲᒥ, ᐃᓄᒋᐊᕋᓗᓐᓄᑦ ᐅᐸᑦᑕᐅᑦᑕᐅᑎᒋᓪᓗᓂ.
1903-1906: ᕋᓄᑦ ᐊᒪᓐᓴᓐ, ᓄᐊᕇᔾᔭᒦᓐᖓᖅᓯᒪᔪᖅ, ᓯᕗᓪᓕᖅᐹᖑᓪᓗᓂ ᐃᑳᓚᐅᖅᓯᒪᔪᖅ ᐅᑭᐅᖅᑕᖅᑐᒥ ᐊᒥᐊᕐᔪᐊᒃᑯᑦ ᐊᖅᑯᑕᐅᕙᑦᑐᓂᒃ, ᔪ.
1903: ᓯᕗᓪᓕᖅᐹᖑᓚᐅᖅᓯᒪᔪᑦ ᐱᖓᓱᑦ ᐸᓖᓰᑦ ᐸᓖᓯᒃᑯᕕᓕᐅᒪᐅᖅᓯᒪᔪᑦ ᐅᑭᐅᖅᑕᖅᑐᒥ ᐳᐊᑦ ᒪᒃᐴᓴᒥᑦ, ᐳᓗᑕᓐ, ᐊᒻᒪᓗ ᕼᐅᓱ ᕿᑭᖅᑕᖓᓐᓂ. ᓯᕗᓪᓕᖅᐹᒥ ᐃᖏᕐᕋᓚᐅᖅᓯᒪᔪᖅ ᑲᔪᓯᓪᓗᓂ ᑲᓇᑕᐅᑉ ᐅᒥᐊᕐᔪᐊᖓ ᓇᑉᑐᓐ ᑎᒍᓯᔭᖅᑐᓕᖅᑐᒃ ᐅᑭᐅᖅᑕᖅᑐᒥ.
1905: ᑭᓪᓕᖏᑦ ᐊᐅᐴᑕᒥ, ᓴᔅᑳᑦᓱᐊᒥ, ᒫᓂᑐᐸᓗ ᐱᖓᓐᓇᖓᓅᖓᔪᑦ ᐅᑭᐅᖅᑕᖅᑐᒧ. ᔫᑳᓐ ᓄᓇᑦᑎᐊᕐᓗ ᐃᓚᒋᓪᓗᓂᒋᑦ ᐊᒥᐊᒃᑯᖏᑦ.
1905: ᓯᕗᓪᓕᖅᐹᒥ ᐅᒥᐊᕐᔪᐊᖅᑕᖃᓚᐅᖅᓯᒪᔪᖅ ᑲᓇᑕᒥᐅᑦ ᐅᒥᐊᕐᔪᐊᖓ ᐅᑭᐅᖅᑕᖅᑐᒨᖅᑐᓂ, ᑳᐱᑕᖃᖅᑐᓂ ᔫᓯᐱ ᐊᐃᔨᐅᒥᑦ, ᐴᓂᐊ, ᑲᓇᑕᐅᑉ ᑎᒍᓂᐊᓕᖅᑕᖓᓐᓂ ᐅᑭᐅᖅᑕᖅᑐᑉ ᕿᑭᖅᑕᖏᓐᓂ.
1911: ᓂᐅᕕᖅᑎᒃᑯᑦ ᓂᐅᕕᕐᕕᑖᓚᐅᖅᓯᒪᔪᑦ ᑭᒻᒥᕈᒻᒥ, ᕿᑭᖅᑖᓗᒻᒥ
1912: ᐊᐃᑉᐹᖅᑎᒍᑦ ᐊᐅᓚᑦᑎᓂᖏᓐᓂ ᑐᓂᓯᓚᐅᖅᓯᒪᔪᑦ ᑯᐸᐅᑉ ᑕᕐᕋᖓᓐᓄᑦ ᑕᐃᑲᓐᖓᑦ ᒐᕙᒪᑐᖃᒃᑯᓐᓂ. ᑯᐸᒃᑯᑦ ᐃᖅᑲᖅᑐᐃᕕᕐᔪᐊᓕᐊᕈᔾᔨᓚᐅᖅᓯᒪᔪᑦ ᐋᑐᕚ ᐃᓱᒪᓕᐊᒥᓂᖓᓐᓂ.
1912: ᓂᐅᕕᖅᑎᒃᑯᑦ ᐅᒥᐊᕐᔪᐊᖓ ᓇᔅᑯᐱ ᐅᑭᐅᖅᑕᖅᑐᒨᖃᑦᑕᓕᓚᐅᖅᓯᒪᔪᖅ. ᐅᒥᐊᕐᔪᐊᖅ ᐊᕐᕌᒍᑕᒫᑦ ᐅᑭᐅᖅᑕᖅᑐᓕᐊᖅᐸᑦᑐᓂ ᑭᓯᐊᓂ ᑭᕕᒻᒪᑦ ᑭᓐᖓᐃᑦ ᖃᓂᒋᔭᖓᓂ 1947-ᒥ.
1913: ᓂᔅᑲ ᐊᓪᓚᐃᑦ ᐱᖓᓐᓇᖓᓂ ᐳᕆᑎᔅ ᑲᓚᒻᐱᐊ ᐊᑎᓕᖅᑎᑦᑎᓇᓱᐊᓚᐅᖅᓯᒪᔪᑦ ᓄᖅᑲᑎᑦᑎᒐᓱᐊᖅᑐᑎᒃ ᓚᓐᑕᓐ ᑲᑎᒪᔨᕈᕋᓱᐊᖅᑐᓂᒃ ᓄᓇᑖᕈᑎᔅᓴᖏᓐᓂ ᐃᓕᓴᖅᓯᖁᔨᓪᓗᑎᒃ.
1913: ᓂᐅᕕᖅᑎᒃᑯᑦ ᓂᐅᕕᕐᕕᓕᐅᓚᐅᖅᓯᒪᔪᑦ ᑭᓐᖓᕐᓂ, ᕿᑭᖅᑖᓗᒻᒥ.
1920: ᐅᖅᓱᐊᓗᔅᓯᐊᓚᐅᖅᓯᒪᔪᑦ ᓄᐊᒪᓐ ᕕᐅᔅᒥ ᒪᑲᓐᔨ ᕚᓕᖓᓂ (ᑖ ᓱ).
1920: ᓂᐅᕕᖅᑎᒃᑯᑦ ᓂᐅᕕᐊᔅᓴᖃᓕᓚᐅᖅᓯᒪᔪᑦ ᐃᓄᓐᓄᑦ ᐅᒥᐊᕐᓂᑦ ᐅᑭᐅᖅᑕᖅᑐᑉ ᑲᓇᓐᓇᖓᓂ.
1921: ᑲᓇᑕᐅᑉ ᒐᕙᒪᒃᑯᖏᑦ ᐊᑎᓕᐅᓚᐅᖅᓯᒪᔪᑦ ᐊᖏᕈᒻᒥᑦ 11-ᖓᓐᓂ 21-ᓄᑦ ᐊᓪᓚᓄᑦ ᓄᓇᑦᑎᐊᕐᒥ.
1921: ᓄᑖᑦ ᐅᑭᐅᖅᑕᖅᑐᑉ ᐊᕕᑦᑐᖅᓯᒪᓂᖓᓂ ᑲᑎᒪᔨᑦᑖᓚᐅᖅᓯᒪᔪᑦ ᑎᒃᑯᐊᖅᓯᓪᓗᑎᒃ ᓄᓇᑦᑎᐊᕐᒥ. ᐅᑭᐅᖅᑕᖅᑐᒥ ᐊᓪᓚᕕᖃᓚᐅᖅᓯᒪᔪᑦ ᐳᐊᑦ ᓯᒥᑦᒥ, ᑐᑦᑕᕐᕕᒋᔭᐅᓕᖅᑐᓂ ᑕᐃᒪᖓᓐᓂ 1911-ᒥᓂᑦ. ᑭᓯᐊᓂᓕ, ᒪᓕᒐᖅᑎᒍᑦ ᑐᑦᑕᕐᕕᒋᔭᐅᓕᓚᐅᖅᓯᒪᔪᖅ ᐋᑐᕚᒦᖏᓐᓇᖅᑐᓂ. ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᑦ ᐊᓪᓚᕕᖓᓐᓂ ᑲᒪᒋᔭᐅᓚᐅᖅᓯᒪᔪᑦ ᐸᓖᓯᒃᑯᓐᓄᑦ.
1922: ᓯᕗᓪᓕᖅᐸᒥ ᐅᑭᐅᖅᑕᖅᑐᑉ ᑲᓇᓐᓇᖓᓅᓚᐅᖅᓯᒪᔪᑦ ᐅᐊᑦᑎᔩᑦ ᐅᒥᐊᕐᔪᐊᒃᑯᑦ ᑳᐱᑕᖃᖅᑐᑎᒃ ᐸᓂᐊᒥᑦ. ᐅᐊᑦᑎᔩᑦ ᓄᑖᖑᓪᓗᑎᒃ ᐊᐅᓚᐅᑕᐅᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᑲᓇᓐᓇᐅᑉ ᐅᑭᐅᖅᑕᖅᑐᖓᓐᓄᑦ. ᓘᑦᑖᖅ ᓖᓯᓕ ᓕᕕᖕᑕᓐ, ᐅᐊᑦᑎᔨᐅᖃᑕᐅᔪᖅ, ᓯᕗᓪᓕᖅᐹᖏᓪᓗᓂ ᐳᓚᕋᕐᓂᓚᐅᖅᓯᒪᔪᖅ ᐃᓄᓐᓂᒃ ᕿᑭᖅᑖᓗᒻᒧᑦ.
1925: ᑭᓪᓕᖏᑦ ᓄᓇᑦᑎᐊᕐᒧ ᐅᖓᓯᓪᓕᒋᐊᖅᑕᐅᓪᓗᑎᒃ ᑕᑉᐸᐅᓐᖓᓕᒫᕌᓗᒃ ᐅᑭᐅᖅᑕᖅᑐᑉ ᑲᔾᔨᖓᓐᓄᑦ.
1926: ᐅᑭᐅᖅᑕᖅᑐᖅ ᐊᑎᖓ ᐅᒥᐊᕐᔪᐊᖅ ᒥᓗᐊᖅᑐᓂ, ᑲᓇᓐᓇᖓᑕ ᐅᑭᐅᖅᑕᖅᑐᑉ ᐅᐊᑦᑎᖏᑦ ᐳᓚᕋᓕᖅᑐᑦ ᐱᐅᑎᒃᑯᑦ, ᐅᒥᐊᕐᔪᐊᖅ ᓅᐸᓪᓛᒦᓐᖓᖅᓯᒪᔪᖅ.
1926: ᐋᖏᓕᑲᒃᑯᑦ ᒪᑐᐃᖅᓯᓚᐅᖅᑐᑦ ᐋᓐᓂᐊᕕᒻᒥᑦ ᐊᒃᓛᕕᒻᒥᑦ.
1927: ᐃᔅᓯᕋᕐᔪᐊᒃᑯᑦ ᐋᓐᓂᐊᕕᒻᒥᑦ ᒪᑐᐃᖅᓯᓪᓗᑎᒃ ᐊᒃᓛᕕᒻᒥ.
1920s: ᐃᓄᖏᑦ ᑲᓇᑕᒥ ᐃᓄᐃᓴᓪᓕᕙᓪᓕᐊᖅᓯᒪᔪᑦ ᐃᓄᒋᐊᔅᓯᕙᓪᓕᐊᓪᓗᑎᒃ ᐊᓛᔅᑲᒥ ᑲᓛᖠᐅᓪᓗ ᓄᓈᓂ.
1929: ᐃᔅᓯᕋᕐᔪᐊᒃᑯᑦ ᐋᓐᓂᐊᕕᓕᐅᖅᑐᑎᒃ ᐃᒡᓗᓕᒑᕐᔪᒻᒥ.
1931:ᐅᖃᓕᒫᒐᑦ ᐃᓄᐃᑦ ᖃᐅᔨᒪᓂᖏᓐᓂ ᓴᖅᑭᖅᑕᐅᓚᐅᖅᓯᒪᔪᖅ ᓂᐅᕕᖅᑎᑯᓐᓄᑦ ᐊᑐᖅᑕᐅᖃᑦᑕᕐᓂᐊᕐᖓᑕ ᑲᓇᓐᓇᖓᓂ ᐅᑭᐅᖅᑕᖅᑐᑉ ᐃᓄᖏᓐᓄᑦ.
1932: ᑲᓇᓐᓇᖓᓂ ᐅᑭᐅᖅᑕᖅᑐᑉ ᐅᐊᑦᑎᖏᑦ ᐃᑭᒪᓕᖅᑐᑎᒃ ᐅᓐᖓᕙ ᓇᔅᑯᐱᒻᒥᓪᓗ, ᒪᕐᕉᒃ ᓂᐅᕕᖅᑎᒃᑯᑦ ᐅᒥᐊᕐᔪᐊᖏᑦ, ᐅᐊᑦᑎᔪᒫᕐᓂᐊᖅᑐᑎᒃ ᐅᑭᐅᖅᑕᖅᑐᑉ ᐃᒪᖏᓐᓂ.
1939-1945: ᓯᓚᕐᔪᐊᒥ ᐊᐃᑉᐸᖓᓐᓂ ᐅᓇᑕᕕᔾᔪᐊᖅᑐᑦ. 1,000 ᒥᐊᓕᒐᐃᑦ ᐅᓇᓕᖏᑦ ᐃᖅᑲᓇᐃᔭᖅᑏᓪᓗ ᑎᑭᑦᑐᑎᒃ ᒎᔾᔪᐊᒧ 1939-ᖑᑎᓪᓗᒍ.
1939 ᓯᕗᓂᖓᓄᓪᓗ: ᐊᒥᓱᐃᑦ ᐃᓄᐃᑦ ᐊᓪᓚᐃᓪᓗ ᐊᐅᓪᓚᖅᑎᑕᐅᓪᓗᑎᒃ ᖃᓪᓗᓇᓄᑦ ᐳᕙᓪᓗᒋᐊᖅᑐᖅᑐᑎᒃ.
1942: ᒥᐊᓕᒐᐃᑦ ᐅᓇᖏᑦ ᖃᖓᑕᓲᒃᑯᕕᓕᐅᖅᑐᑎᒃ ᓯᐅᕕᐊ ᒍᕆᓂᐅ ᑰᖓᓐᓂ ᐳᕉᐱᓱ ᐸᐃ ᐃᓚᖓᓐᓂ. ᐅᓇᑕᖅᑐᖃᖅᑎᓪᓗᒍ ᓱᓕ 5,000 ᒥᐊᓕᒐᐃᑦ ᐅᓇᓕᖏᑦ ᑎᑭᓚᐅᖅᓯᒪᔪᑦ. ᐊᒥᓱᑦ ᐃᓄᐃᑦ ᐅᐸᒍᑎᓪᓗᑎᒃ ᐃᖅᑲᓇᐃᔮᖅᓴᖅᓯᐅᕆᐊᖅᑐᑎᒃ. ᐳᕉᐱᓱ ᐸᐃ ᓴᖅᑭᖅᑐᓂ.
1944: ᒥᔅᓴᐅᓴᖅᑕᐅᓯᒪᔪᑦ ᑕᒫᓂ 80%-ᖏᓐᓂ ᐃᓄᐃᑦ ᓱᕈᓰᑦ ᐃᓕᓐᓂᐊᓚᐅᖅᓯᒪᓐᖏᒋᐊᖏᑕ.
1944: ᐅᑭᐅᖅᑕᖅᑐᑉ ᐅᐊᓐᓇᖓᓂ, 213-ᓂᒃ ᐃᓪᓕᓕᓐᓂᒃ ᐋᓐᓂᐊᕕᑦᑕᖃᖅᑐᖅ ᐃᓄᓐᓄᑦ 8,000-ᓄᑦ. ᐅᑭᐅᖅᑕᖅᑐᑉ ᑲᓇᓐᓇᖓᓂ, 48-ᓂᒃ ᐃᓪᓕᑦᑕᖃᖅᑐᖅ ᐋᓐᓂᐊᕕᓐᓂᒃ 3,762-ᓄᑦ.
1948: ᔭᐃᒻ ᕼᐃᐅᔅᑕᓐ ᓂᐅᕕᖃᑦᑕᓕᓚᐅᖅᓯᒪᔪᖅ ᐃᓄᐃᑦ ᓴᓇᓐᖑᐊᒐᖏᓐᓂ ᑐᒑᕐᓂᓪᓗ ᐃᓄᔾᔪᐊᕐᒥ.
1948: ᒪᑐᐃᖅᓯᓚᐅᖅᓯᒪᔪᑦ ᒐᕙᒪᒃᑯᑦ ᐋᓐᓂᐊᕕᖓᓐᓂ ᑐᓚᒃᑕᕕᒻᒥ, ᓯᕿᕐᓂᕐᒥᐅᓂᑦ.
1949: ᓯᕗᓪᓕᖅᐹᒥ ᒐᕙᒪᑐᖃᒃᑯᑦ ᐃᓕᓐᓂᐊᕐᕕᖓ ᒪᑐᐃᓚᐅᖅᓯᒪᔪᖅ ᐃᓄᔾᔪᐊᕐᒥ.
1949: ᓛᐸᑐᐊ ᓅᐸᓪᓛᓪᓗ ᑲᑎᓐᖓᖃᑕᐅᓕᓚᐅᖅᓯᒪᔫᒃ ᑲᓇᑕᒧᑦ.
1949: ᓯᓚᓐᓂᐊᖅᑎᒃᑯᕕᒻᒥ ᒪᑐᐃᖅᓯᓚᐅᖅᓯᒪᔪᑦ ᐊᓇᑕᐃ ᑕᓯᖓᓐᓂ ᑭᕙᓪᓕᕐᒥ. ᐊᕼᐃᐊᕐᒥᑦ ᑕᐃᑲᓂᒥᐅᑕᐅᓚᐅᖅᓯᒪᔪᑦ ᐊᐅᓪᓛᖅᑕᐅᓐᓂᓚᐅᖅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓅᑕᓐ ᑕᓯᖓᓐᓄᑦ, 100 ᑭᓚᒦᑕᒥᑦ ᐅᖓᓯᓐᓂᖃᖅᑐᑦ ᓂᒋᐊᓄᑦ. ᐊᐅᓪᓚᖅᑕᐅᓐᓂᓚᐅᖅᓯᒪᔪᑦ ᐃᓱᒪᒋᔭᐅᓪᓗᑎᒃ ᑐᕚᖃᓗᐊᕐᓂᐊᖅᑐᒋᔭᐅᓪᓗᑎᒃ ᐃᖅᑲᓇᐃᔭᖅᑎᖏᓐᓂ ᓯᓚᓐᓂᐊᖅᑎᒃᑯᑦ. ᐅᐊᑦᑎᐊᕉᓐᖏᑦᑐᖅ, ᐊᐅᓪᓛᖅᑕᒥᓂᑦ ᐃᓄᐃᑦ ᐅᑎᕐᓂᓚᐅᖅᓯᒪᔪᑦ ᐊᓇᑕᐃ ᑕᓯᖓᓐᓄᑦ.
1950: ᑲᓇᑕᐅᑉ ᒐᕙᒪᒃᑯᖏᑦ ᐊᑭᓖᖅᓱᐃᓚᐅᖅᓯᒪᔪᑦ ᓰᑏ ᕼᐊᐅᒥᑦ. ᓯᕗᓪᓕᖅᐹᒥ 18-ᓂᒃ ᐅᑭᐅᖑᓕᖅᑐᓂᒃ, ᐅᑭᐅᖅᑕᖅᑐᒥ ᐅᐊᑦᑎᖏᑦ ᑐᕚᖃᔾᔮᒍᓐᓃᖅᑐᑦ ᓂᐅᕕᖅᑎᒃᑯᑦ ᐅᒥᐊᕐᔪᐊᖓᓐᓂ. ᐃᑭᒪᔪᑦ ᐸᓖᓰᑦ, ᑭᒍᓐᓂᐊᖅᑏᑦ, ᓘᑦᑖᑦ, ᐋᓐᓂᐊᓲᖅᑏᑦ ᐱᖓᓲᔪᖅᑐᓂᒃ ᐃᓪᓕᓂᒃ ᖃᓂᒪᔪᓄᑦ ᐊᑐᖅᑕᐅᔪᔅᓴᒫᕐᓂᑦ. ᓰᑏ ᕼᐊᐅᒃᑯᑦ ᐊᕐᕌᒍᑕᒫᑦ ᐳᓚᕋᖃᑦᑕᓚᐅᖅᓯᒪᔪᑦ ᑎᑭᑦᑐᒍ 1968.
1951: ᐊᓪᓚᐃᑦ ᐱᖁᔭᖏᑦ ᐊᓯᔾᔨᖅᑕᐅᓪᓗᑎᒃ, ᐊᑐᐃᓐᓇᐅᑎᑦᑎᓂᖅᓴᐅᓕᖅᑐᑎᒃ ᓄᓇᖃᖅᑳᖅᑐᒥᓃᑦ ᓄᓇᑖᕈᑎᔅᓴᖏᓐᓂ. ᑕᐃᒪᓐᖓᓂ 1921-ᒥᓂᑦ, ᒪᓕᒐᖅᑎᒍᑦ ᓯᖁᒥᑦᑎᒐᔭᓚᐅᖅᑐᑦ ᑲᓇᑕᒥᐅᑦ ᓄᓇᖃᖅᑳᖅᑐᖏᑦ ᑲᑎᒪᑎᑦᑎᒐᓱᐊᕐᓂᕈᑎᒃ ᓄᓇᑖᕈᑎᔅᓴᓂᒃ. ᐊᖅᑭᒋᐊᖅᑕᐅᓯᒪᔪᖅ ᐱᖁᔭᖅ ᐱᔪᓐᓇᑎᑦᑎᓚᐅᖅᑐᖅ ᓄᓇᖃᖅᑳᖅᑐᒥᓂᕐᓂᑦ ᐃᖅᑲᓇᐃᔭᖅᑎᑖᖅᑐᑎᒃ ᒪᓕᒐᓕᕆᔨᒥᒃ ᐅᕝᕙᓘᓐᓃᑦ ᑲᑎᒪᓪᓗᑎᒃ ᐱᖅᑯᓯᖏᓐᓂ ᑐᔅᓯᐊᕈᓐᓇᓚᐅᖅᑐᑦ ᓲᕐᓗ ᑕᕐᕋᐃᑦᑐᓄᑦ ᒧᒥᕐᓂᕐᒥᑦ, ᓯᕿᓂᒧ ᒧᒥᕐᓂᕐᒥᑦ ᐅᕝᕙᓘᓐᓃᑦ ᐊᓯᖏᓐᓂ.
1953: ᑲᖏᖅᖠᓂᕐᒥ ᐅᔭᕋᕐᓂᐊᕐᕕᒃ ᒪᑐᐃᖅᑐᓂ ᑲᖏᖅᖠᓂᐅᑉ ᖃᓂᒋᔭᖓᓂ, ᐅᐊᓐᓇᖅᐸᓯᖓᓐᓂ ᑲᖏᖅᓱᐊᓘᑉ ᐃᒪᖓᓐᓂ. ᑮᓇᐅᔭᔅᓴᓂᒃ ᓴᕕᕋᔭᔅᓴᓂᓪᓗ ᐅᔭᕋᕐᓂᐊᖅᐸᑦᑐᑦ. ᐃᓄᐃᑦ ᓇᑭᓐᖔᖅᓯᒪᑐᐃᓐᓇᖅᑐᑦ ᑭᕙᓪᓕᕐᒥ ᖃᓂᒋᔭᖓᓐᓄᑦ ᐅᔭᕋᕐᓂᐊᕐᕕᒻᒧᑦ ᐊᐅᓪᓛᖅᑐᑦ ᐃᖅᑲᓇᐃᔮᔅᓴᖅᓯᐅᕆᐊᖅᑐᑎᒃ.
1954: ᐃᓄᐃᑦ ᓂᕈᐊᕈᓐᓇᖅᓯᑎᑕᐅᕗᑦ ᒐᕙᒪᑐᖃᒃᑯᑦ ᓂᕈᐊᕐᓇᕐᓂᖏᓐᓂ.
1953: 12 ᐃᓄᐃᑦ ᐃᓚᒌᑦ ᐊᐅᓪᓛᖅᑕᐅᕗᑦ ᐃᓄᒃᔪᐊᕐᒥ ᒥᑦᑎᒪᑕᓕᒻᒧᑦ ᐊᐅᓱᐃᑦᑐᒧᓪᓗ ᐊᐅᓱᐃᑦᑐᑉ ᕿᑭᖅᑖᓗᐊᓄᑦ ᖃᐅᓱᐃᑦᑐᒧᓪᓗ ᑕᐃᑲᓂ ᒪᕐᕈᓕᕿᒥᑦ.
1953: ᐃᓚᖏᑦ ᐃᓄᐃᑦ ᐃᓚᒌᑦ ᐊᐅᓪᓛᖅᑕᐅᓪᓗᑎᒃ ᑰᔾᔪᐊᕐᒥᑦ ᑰᔾᔪᐊᕌᓗᒻᒧᑦ, ᒫᓂᑐᐸᒥᑦ.
1954: ᐋᓐᓂᐊᖅᑐᓕᕆᓂᖅ ᐱᐅᓂᖅᓴᐅᓕᕐᖓᑦ, 56%-ᒥᑦ ᑲᑕᓐᓂᖃᓚᐅᖅᓯᒪᔪᖅ ᐳᕙᓪᓗᓐᓈᓘᖃᑦᑕᖅᑐᒥᓂᖅ ᐃᓄᓐᓂᑦ.
1955: ᓴᓇᔭᐅᒋᐊᓯᒪᐅᖅᑐᑦ ᐅᓇᓕᔅᓴᖃᕐᕕᐅᔪᑦ, ᖃᐅᔨᓴᐅᑎᖃᖅᑐᑎᒃ ᑲᓇᑕᐅᑉ ᐅᑭᐅᖅᑕᖅᑎᖏᓐᓂ.
1956: ᐊᑕᐅᓯᖅ ᑕᐃᒃᑯᓇᓐᖓᑦ 7-ᓂᒃ ᐃᓄᓐᓂᒃ ᐊᐅᓪᓚᖅᑎᑕᐅᖃᑦᑕᓚᐅᖅᓯᒪᔪᑦ ᖃᓪᓗᓈᓄᑦ ᐳᕙᓪᓗᒋᐊᖅᑐᖅᑐᑎᒃ.
1957-1958: ᐊᕼᐃᐊᕐᒥᐅᑦ ᐊᓇᑕᐃᒥᐅᑕᐃᑦ ᑕᓯᖓᓐᓂ ᐊᐅᓪᓛᖅᑕᐅᒃᑲᓐᓂᕆᓪᓗᑎᒃ, ᕼᐊᓂᒃ ᑕᓯᖓᓐᓄᑦ. ᐊᔅᓱᕈᓚᐅᖅᑎᓪᓗᒋᑦ ᑐᑦᑐᑕᖃᓚᐅᓐᖏᒻᒪᑦ (ᐱᖓᓱᑦ ᐊᕼᐃᐊᕐᒥᐅᑦ ᑎᒍᔭᐅᓚᐅᖅᓯᒪᔪᑦ ᐃᓵᖅᓴᕐᓂᒥᓂᖏᓐᓄᑦ ᐅᔭᕋᕐᓂᐊᕐᕕᒻᒥ ᓂᕿᓯᐅᖅᑐᑎᒃ, ᒪᕐᕉᒃ ᐃᓄᐊᖅᑕᐅᓪᓗᑎᒃ, ᐱᖓᓲᔪᖅᑐᓪᓗ ᑐᖁᓪᓗᑎᒃ ᑳᓗᐊᒧᑦ), ᑲᓇᑕᐅᑉ ᒐᕙᒪᒃᑯᖏᑦ ᐊᐅᓪᓛᑎᑦᑎᓚᐅᖅᓯᒪᒻᒥᔪᑦ ᐊᕐᕕᐊᓄᑦ.
1958: ᓴᓇᔭᐅᓚᐅᖅᓯᒪᔪᖅ ᓯᕗᓪᓕᖅᐹᒥ ᐋᓐᓂᐊᕕᒃ ᐳᕉᐱᓱ ᐸᐃᒥ.
1959: ᒐᕙᒪᑐᖃᒃᑯᑦ ᐱᒋᐊᖅᑎᑦᑎᓚᐅᖅᓯᒪᔪᑦ ᐅᑭᐅᖅᑕᖅᑐᒥ ᑯᐊᐸᐅᔪᓂᒃ ᓄᓇᑦᑎᐊᕐᒥ.
1959: ᒐᕙᓚᑐᖃᒃᑯᑦ ᐃᓅᕕᓕᐅᓕᓚᐅᖅᓯᒪᔪᑦ ᒪᑲᓐᔨ ᑎᐅᓪᑕᒥ.
1959: ᔭᐃᒻᔅ ᕼᐃᐅᔅᑕᓐ ᐃᑲᔪᓚᐅᖅᓯᒪᔪᖅ ᐃᓄᓐᓂᒃ ᑎᑎᖅᑐᒐᕐᕕᓕᐅᖅᑎᓪᓗᒋᑦ ᑭᓐᖓᕐᓂ.
1959: ᓯᕗᓪᓕᖅᐹᒥ ᐃᓄᐃᑦ ᑯᐊᐸᓕᐅᓚᐅᖅᓯᒪᔪᑦ ᑲᖏᖅᓱᐊᓗᔾᔪᐊᕐᒥ ᑯᐸᐅᑉ ᑕᕐᕋᖓᓂ.
1960: ᒪᑐᔪᖅ ᐅᓇᑕᖅᑐᓄᑦ ᖃᐅᔨᓴᕐᕕᐊᓗᒃ. ᑕᐃᒪᓕ ᐃᓄᐃᑦ ᓄᓇᒋᓚᐅᖅᓯᒪᔭᒥᓅᕆᐊᖃᓕᖅᑐᑦ ᐃᓅᓇᓱᐊᓕᕐᓗᑎᒃ.
1960: ᐊᖏᕈᑎᖓ ᐊᓪᓚᐃᑦ ᒪᓕᑦᑐᒋᑦ ᓂᕈᐊᕈᓐᓇᖅᓯᑎᑕᐅᓕᓚᐅᖅᑐᑦ ᒐᕙᒪᑐᖃᒃᑯᑦ ᓂᕈᐊᕐᓇᕐᓂᖓᓐᓂ.
1961: ᑯᐸᒃ ᐸᓖᓯᒃᑯᖏᑦ, ᐃᓇᖏᖅᓯᓚᐅᖅᑐᑦ ᐸᓖᓯᓂᒃ, ᐃᓕᔭᐅᖔᖅᑐᑎᒃ ᐸᓖᓰᑦ ᑯᐸᐃ ᑕᕐᕋᖓᓐᓂ.
1962: ᐋᒪᓐ ᐹᒻᐸᑎᐅ ᑕᐃᑲᓐᖓᑦ ᕕᐅᑯᐊᑦ, ᑯᐸᒻᒥ, ᓯᕗᓪᓕᖅᐹᒥ ᓯᑭᑐᓕᐅᓚᐅᖅᓯᒪᔪᖅ.
1962: ᐅᑭᐅᖅᑕᖅᑐᑉ ᑲᓇᓐᓇᖓᓃᑦᑐᑦ ᐃᓄᐃᑦ ᓯᕗᓪᓕᖅᐹᒥ ᓂᕈᐊᖅᑐᑦ.
1962: ᑲᖏᖅᖠᓂᕐᒥ ᐅᔭᕋᕐᓂᐊᕐᕕᒃ ᒪᑐᔪᖅ.
1962: ᐱᒋᐊᖅᑐᒍ ᑏᓰᑉᐱᕆ 1962, ᕿᒻᒦᔭᓐᓈᓘᓕᓚᐅᖅᓯᒪᒻᒪᑦ ᖃᓂᒻᒪᑦᑐᑎᒃ 625 ᕿᒻᒦᑦ ᑐᖁᓚᐅᖅᓯᒪᔪᑦ ᑲᖏᖅᑐᐊᓗᒻᒥ. ᐃᓄᐃᑦ ᐊᓯᕙᕈᓐᓇᕐᓂᐊᖅᑐᒋᔭᐅᒍᓐᓃᖅᑐᑎᒃ ᕿᒻᒥᔅᓴᑭᓗᐊᕐᓂᖏᓐᓄᑦ, ᑲᓇᑕᐅᑉ ᒐᕙᒪᒃᑯᖏᑦ ᑲᑎᓯᖁᔨᓕᓚᐅᖅᓯᒪᔪᑦ ᓄᓇᓕᕋᓛᓕᒫᓂᒃ ᐸᓐᓂᖅᑐᒨᕐᓗᑎᒃ. 13 ᓄᓇᓕᕋᓛᑦ ᐳᓚᕋᕐᕕᐅᓪᓗᑎᒃ ᐅᖓᑖᓂ 330 ᐃᐃᓄᑦ ᐊᐅᓪᓛᖅᑕᐅᑲᐃᓐᓇᓚᐅᖅᓯᒪᔪᑦ ᐸᓐᓂᖅᑐᒧ. ᑕᐃᑲᓂ, ᐃᖅᑲᓇᐃᔭᖅᑎᑕᐅᓪᓗᑎᒃ ᐃᓪᓗᖃᖅᑎᑕᐅᓪᓗᑎᓪᓗ. ᐊᓯᕙᖅᑎᑕᐅᕙᑦᑐᑎᓪᓗ. ᒪᐃᒥ, ᐃᓄᐃᑦ ᐅᑎᖅᓯᒪᔪᐃᓐᓇᐸᓘᓕᓚᐅᖅᓯᒪᔪᑦ ᓄᓇᓕᒻᒥᓄᑦ ᕿᒻᒦᔭᓗᐊᕈᓐᓃᕐᖓᑕ.
1963: ᒪᓕᒐᔅᓴᒥᒃ ᑭᓪᓕᓕᐅᖅᑕᐅᖁᓪᓗᒋᑦ ᓄᓇᑦᑎᐊᕐᒥ ᓴᖅᑭᖅᑕᐅᓚᐅᖅᓯᒪᔪᖅ ᑲᓇᑕᐅᑉ ᒪᓕᒐᓕᕆᔨᕐᔪᐊᒃᑯᖏᓐᓂ ᐋᑐᕚᒥᔭ ᑖᓐᓇ ᒪᓕᒐᔅᓴᐅᔪᖅ ᐃᑲᔪᖅᑐᖅᑕᐅᓚᐅᖅᑐᖅ ᔨᐊᓗᓇᐃᒥ ᑮᓇᐅᔭᓕᕆᔨᒃᑯᖏᓐᓄᑦ, ᓄᓇᖃᖅᑳᖅᓯᒪᓐᖏᑦᑐᑦ ᑲᑐᔾᔨᖃᑎᒌᖑᓪᓗᑎᒃ. ᑖᓐᓇ ᒪᓕᒐᔅᓴᖅ ᒪᓕᒐᓕᕆᔨᕐᔪᐊᒃᑯᓐᓅᓚᐅᖅᓯᒪᓐᖏᑦᑐᖅ ᐊᓯᔾᔨᕐᓂᖏᓐᓄᑦ ᒐᕙᒪᒃᑯᑦ ᐊᒻᒪᓗ ᓈᒻᒪᓴᓐᖏᑦᑐᑦ ᐃᓄᖏᑦ ᑲᓇᓐᓇᖓᓐᓂ ᐅᑭᐅᖅᑕᖅᑐᑦ ᓄᓇᑦᑎᐊᖑᐃᓐᓇᕈᒪᔪᓂᒃ.
1964: ᓄᑖᕐᓂᑦ ᓂᕈᐊᖅᑐᑎᒃ ᓕᐳᕈ ᒐᕙᒪᐅᔪᓂᒃ ᐋᑐᕚᒥ ᓴᖅᑮᓪᓗᑎᒃ ᑭᐅᕈᑐᔅ ᑲᑎᒪᔨᖏᓐᓂ ᖃᐅᔨᓴᕐᓂᐊᖅᑐᑎᒃ ᑲᑎᒪᔨᓕᐅᕐᓂᕐᒥᑦ ᓄᓇᑦᑎᐊᕐᒥ.
1965: ᐋᓐᓂᐊᕕᓕᐅᓚᐅᖅᑐᑦ ᑰᔾᔪᐊᕐᒥ ᑖᒃᑯᐊ ᑯᐸᒃᑯᑦ ᒐᕙᒪᒃᑯᖏᑦ.
1966: ᐃᓄᐃᑦ ᑲᓇᓐᓇᖓᓐᓂ ᑲᓇᑕᐅᑉ ᓂᕈᐊᕈᓐᓇᖅᑎᑕᐅᓕᓚᐅᖅᓯᒪᒋᕗᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᑦ ᓂᕈᐊᕐᓇᖓᓂ.
1967: ᓂᔅᒐ ᐃᓪᓚᐃᑦ ᑲᑎᒪᔨᖏᑦ ᐊᑏᓕᒎᖅᓯᓚᐅᖅᓯᒪᕗᑦ ᐳᕆᑎᔅ ᑲᓚᒻᐱᐊ ᒐᕙᒪᒃᑯᖏᓐᓂ ᐊᐅᓪᓚᑦᑎᒐᓱᐊᓕᕆᔅᓯ 1,000 ᒪᐃᓕᓂᒃ ᓄᓇᖃᖅᑳᖅᓯᒪᔪᑦ ᓄᓇᖏᓐᓂ.
1967: ᑭᖑᓂᖓᓂ ᑭᐅᕈᑐᔅ ᑲᑎᒪᔨᖏᓐᓂ ᐊᑐᓕᖁᔨᓚᐅᖅᑐᑦ, ᔨᐊᓗᓇᐃ ᐊᓪᓚᕕᖃᓕᕐᓗᓂ ᒪᓕᒐᓕᐅᕐᕕᖃᓕᕐᓗᓂᓗ ᓄᓇᑦᑎᐊᕐᒥ.
1969: ᓕᐳᕈᒃᑯᓐᓄ ᒥᓂᔅᑕ ᐃᓄᓕᕆᔨᑐᖃᒃᑯᓐᓂ, ᒥᓂᔅᑕ ᔩᓐ ᑯᕆᑦᓯᐊᓐ, ᓴᖅᑮᓚᐅᖅᓯᒪᔪᖅ ᖃᓪᓗᓈᓄᑦ ᑐᕌᖓᔪᒥᑦ (ᖃᐅᔨᒪᔭᐅᒻᒥᔪᖅ 1969-ᒥ ᖃᓪᓗᓈᓄᑦ ᑐᕌᖓᔪᖅ) ᐲᖅᓯᖁᔨᓪᓗᓂ ᐊᓪᓚᓄᑦ ᐱᖁᔭᖏᓐᓂ ᑲᓇᑕᒥ, ᐊᖏᖅᓯᖏᓪᓗᑎᒃ ᓄᓇᖃᖅᑳᖅᑐᒥᓃᑦ ᓄᓇᑖᕈᑎᔅᓴᖏᓐᓂ, ᒪᓕᓪᓗᑎᒃ ᑲᓇᑕᐅᑉ ᓄᓇᖃᖅᑳᖅᑐᒥᓂᖏᓐᓂ ᑕᐃᒪᐃᓪᓗᐊᖅᑎᑕᐅᓗᑎᒃ ᐃᓄᐃᓴᒃᑲᓗᐊᖅᑎᓪᓗᒋᑦ, ᐊᒻᒪᓗ ᓇᓗᓇᐃᖅᑕᐅᓕᕐᓗᑎᒃ ᑲᒪᖏᐊᖃᕐᓂᖏᓐᓂ ᐊᓪᓚᓂᒃ ᐊᕕᑦᑐᖅᓯᒪᔪᓂᒃ. ᑲᓇᑕᒥ ᓄᓇᖃᖅᑳᖅᑐᒥᓃᑦ ᑕᒪᑐᒥᖓ ᐊᖏᓚᐅᓐᖏᑦᑐᑦ. ᒐᕙᒪᑐᖃᒃᑯᑦ ᑕᐃᒫᒃ ᑭᓯᐊᓃᕈᔾᔭᐅᓪᓗᑎᒃ ᓯᕗᒧᐊᒍᓐᓇᐃᓕᓪᓗᑎᑦ.
1970: ᓇᓂᓯᓚᐅᖅᓯᒪᔪᑦ ᐅᖅᓱᐊᓗᓐᓂᑦ ᒑᓯᓂᓪᓗ ᐅᐊᓕᓂᐅᑉ ᑕᕆᐅᖓᓐᓂ ᐊᒻᒪᓗ ᒪᑲᓐᔨ ᑎᐅᑕᒥ (ᑕᒫᓂᖃᐃ 36 ᐱᓕᐊᓂᒃ ᖃᑦᑕᐅᔭᓛᓂᑦ ᐊᒻᒪᓗ 339-ᓂᒃ ᑐᕆᓕᐊᓂᒃ ᖃᑦᑕᐅᔭᓛᓂᒃ ᒑᓯᓂᑦ).
1971: ᐊᓂᒃ ᖃᖓᖅᑕᖅᑎᑕᐅᓚᐅᖅᓯᒪᔪᖅ ᐊᓂᕐᓂᖃᕐᓇᖏᑦᑐᒧᑦ, ᒪᑐᐃᖅᓯᓪᓗᓂ ᐅᑭᐅᖅᑕᖅᑐᒥ
ᑐᓴᐅᒪᖃᑦᑕᐅᑎᒍᓐᓇᓂᕐᒥᑦ.
1971: ᐃᓄᐃᑦ ᑕᐱᕇᑦ ᑲᓇᑕᒥ ᓴᖅᑭᖅᑕᐅᓪᓗᑎᒃ.
1971: ᕌᐳᑦ ᐳᕌᓵ, ᑯᐊᐃ ᓯᕗᓕᖅᑎᖓ, ᐸᕐᓇᐅᑎᖏᓐᓂ ᓴᖅᑮᓚᐅᖅᓯᒪᕗᖅ ᓯᕿᕐᓂᕐᒥᐅᑦ ᐆᒻᒪᖅᑯᑎᔅᓴᐅᒐᔭᖅᑐᓂᒃ. ᐃᖅᑭᓖᑦ ᐃᓄᐃᓪᓗ, ᑲᑎᒪᑎᑕᐅᓚᐅᖅᓯᒪᓐᖏᑦᑐᑦ, ᐊᔅᓱᐊᓗᒃ ᓈᒻᒪᓴᕐᓂᓚᐅᖅᓯᒪᓐᖏᑦᑐᑦ ᑕᒪᑐᒥᖓ.
1972: ᐋᖏᓕᑲᒃᑯᑦ ᐃᓪᓗᖅᐸ ᒪᑐᓚᐅᖅᓯᒪᕗᖅ ᐸᓐᓂᖅᑐᒥ. ᐋᓐᓂᐊᕕᒻᒥᑦ ᒪᑐᐃᖅᓯᓪᓗᑎᒃ.
1973: ᓂᔅᒐ ᓵᓚᒋᔭᐅᓚᐅᖅᑐᖅ ᐃᖅᑲᖅᑐᐃᕕᕐᔪᐊᓕᐊᕈᑎᓚᐅᖅᓯᒪᔭᖓᓐᓂ ᑳᓪᑐᒥᑦ ᐃᖅᑲᖅᑐᐃᕕᒃ ᐃᓱᒪᓕᐅᖅᓯᒪᓚᐅᓐᖏᒻᒪᑕ ᓂᔅᒐᒃᑯᑦ ᑎᒍᓯᓂᐊᕐᒪᖔᑕ ᓄᓇᒥᑦ. ᑭᓯᐊᓂᓕ, ᐃᖅᑲᖅᑐᐃᕕᒃᑯᑦ ᐃᓕᓴᖅᓯᓯᒪᔪᑦ ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᖏᓐᓂ ᓄᓇᒧᑦ ᓄᓇᒦᓐᖔᖅᑐᓂᓪᓗ ᓯᕗᓂᖓᓂ ᐱᑕᖃᕇᓚᐅᖅᓯᒪᔪᓂᒃ. ᑖᓐᓇ ᐃᓱᒪᓕᐅᖅᑕᐅᓚᐅᖅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᓐᓂ ᓄᑖᕐᓂᑦ ᐱᖁᔭᓕᐅᕆᐊᖃᖅᑐᑎᒃ ᑲᒪᓂᐊᖅᑐᑎᒃ ᓄᓇᖃᖅᑳᖅᑐᒥᓃᑦ ᓄᓇᑖᕈᑎᔅᓴᖏᓐᓂ.
1973: ᒥᓂᔅᑕ ᔩᓐ ᑯᕆᑦᓯᐊᓐ, ᒥᓂᔅᑕᐅᔪᖅ ᐃᓄᓕᕆᔨᑐᖃᒃᑯᓐᓄᑦ, ᓇᓗᓇᐃᖅᓯᓚᐅᖅᓯᒪᔪᖅ ᕙᒐᒪᑐᖃᒃᑯᑦ ᐊᐃᕙᔾᔪᑎᖃᖃᑦᑕᕐᓂᐊᓕᕐᖓᑕ ᐋᖅᑮᓇᓱᐊᕐᓗᑎᒃ ᓄᓇᖃᖅᑳᖅᓯᒪᔪᑦ ᓄᓇᑖᕈᑎᔅᓴᖏᓐᓂ.
1973: ᑯᐸᒃᑯᑦ ᑲᑐᔾᔨᖃᑎᒌᖏᑦ ᐊᓪᓚᓄᑦ ᑮᓇᐅᔭᖅᓯᓇᓱᐊᖅᑐᑦ ᑯᐸᒃᑯᑦ ᒐᕙᒪᒃᑯᖏᓐᓂ ᐃᖅᑲᖅᑐᐃᔨ ᒪᓘᑉ ᑯᐸᐃ ᐃᖅᑲᖅᑐᐃᕕᔾᔪᐊᖓᓐᓂ ᐃᓕᓴᖅᓯᓯᒪᓚᐅᖅᑐᑦ ᐱᔪᓐᓇᐅᑎᖏᓐᓂ ᐃᖅᑭᓖᑦ ᐃᓄᐃᓪᓗ ᓄᖅᑲᑎᑦᑎᓕᖅᑐᓂ ᓯᕿᓐᓂᕐᒥᑦ ᐆᒻᒪᖅᑯᑎᔅᓴᓕᕆᓂᕐᒥᑦ.
1974: ᐃᓄᐃᑦ ᓄᓇᖃᖅᑳᖅᑐᒥᓂᕐᓂᑦ ᑲᑎᒪᔨᑦᑖᓚᐅᖅᑐᑦ ᓴᖅᑭᖅᑕᐅᓪᓗᑎᒃ ᒐᕙᒪᑐᖃᒃᑯᓐᓄᑦ.
1974: ᓄᓇᑦᑎᐊᑉ ᐱᖁᔭᖏᑦ ᐊᓯᔾᔨᖅᑕᐅᓚᐅᖅᑐᑦ. ᒫᓐᓇᐅᓕᖅᑐᖅ, ᓄᓇᑦᑎᐊᑉ ᒐᕙᒪᒃᑯᖏᑦ ᓂᕈᐊᖅᑕᐅᓯᒪᔫᓛᓕᖅᑐᑦ 15-ᓂᒃ ᑲᑎᒪᔨᖃᕐᓗᑎᑦ ᑎᒥᖓ.
1974-1977: ᒪᑲᓐᔨ ᕚᓕᒥ ᓱᓪᓗᓕᓕᐅᕈᒪᔪᑦ, ᖃᐅᔨᒪᔭᐅᒻᒥᔪᖅ ᐴᔪ ᑲᒥᓴᓐ, ᖃᐅᔨᓴᕈᒫᕐᓂᐊᖅᑐᑦ ᒪᑲᓐᔨ ᕚᓕᒥ ᓱᓪᓗᓕᓕᐅᕈᓐᓇᕐᒪᖔᑕ.
1975: ᑕᓇᐃ ᓇᓗᓇᐃᖅᓯᓚᐅᖅᑐᑦ ᐱᔪᓐᓇᐅᑎᒥᓂᒃ ᓇᒻᒥᓂᖅ ᐊᐅᓚᑦᑎᒍᓐᓇᖁᓪᓗᖏᑦ ᑕᓇᐃ ᐃᖅᑭᓖᓪᓗ.
1975: ᓯᕿᓐᓂᕐᒥᐅᑦ ᑯᐸᐃᓪᓗ ᑕᕐᕋᖓᓂ ᐊᖏᕈᑎᖓ ᐊᑎᓕᐅᖅᑕᐅᓪᓗᓂ ᑖᒃᑯᓂᖓ ᑯᐸᒃ ᒐᕙᒪᒃᑯᖏᓐᓂ, ᐃᖅᑭᓕᓂᒃ ᐃᓄᓐᓂᓪᓗ.
1976: ᐃᓄᐃᑦ ᑕᐱᕇᔅᓴᑦ ᑲᓇᑕᒥ ᓯᕗᓪᓕᖅᐹᒥ ᓴᖅᑮᕗᑦ ᑐᔅᓯᕋᐅᑎᒥᓂᒃ ᓄᓇᕗᑦᑖᕈᒪᓪᓗᑎᒃ ᐅᓂᒃᑳᓕᐊᖏᓐᓂ ᐊᑎᖃᖅᑐᒥᒃ ᓄᓇᕗᑦ: ᑐᔅᓯᕋᐅᑎᒃ ᐃᓄᐃᑦ ᓄᓇᑖᕈᑎᔅᓴᖏᓐᓂ ᓄᓇᑦᑎᐊᕐᒥ.
1976: ᐃᓅᕕᐊᓗᐃᑦ ᐊᕕᓚᐅᖅᑐᑦ ᐃᓄᐃᑦ ᑕᐱᕇᔅᓴᒃᑯᑦ ᑲᓇᑕᒥ ᐊᐃᕙᔾᔪᑎᖃᕐᓂᐊᕐᖓᑕ ᐃᓛᒃᑰᕐᓗᑎᒃ ᓄᓇᑖᕈᑎᒧᑦ ᐊᖏᕈᑎᖓᓐᓂ ᓴᖅᑮᔪᒪᓪᓗᑎᒃ ᐅᐊᓕᓂᐅᑉ ᑕᕆᐅᖓᓄᑦ. ᐃᓅᕕᐊᓗᐃᑦ ᑭᒡᒐᖅᑐᖅᑕᐅᓪᓗᑎᒃ ᑲᑎᒪᔨᕋᓛᕐᓄᑦ ᓄᓇᖃᖅᑳᖅᓯᒪᔪᓂᒃ ᐃᓄᓐᓂᒃ ᑎᒍᓯᒍᓐᓇᕐᓂᖏᓐᓂ.
1976: ᓄᓇᑦᑎᐊᖅ ᒪᓕᒐᓕᕆᔨᒃᑯᑦ ᑲᑎᒪᔨᖏᑦ ᓄᓇᑦᑎᐊᕐᒥ ᒪᓕᒐᓕᕆᔨᕈᖅᑐᑎᒃ.
1977: ᑐᕉᓕ ᑎᒃᑯᐊᖅᑕᐅᓪᓗᓂ ᓯᕗᓕᖅᑎᐅᓂᕐᒧᑦ ᑲᓇᑕᒥ, ᐱᐅ ᑐᕉᑐ, ᐅᓂᒃᑳᓕᐅᕆᐊᖃᖅᑐᓂ ᒪᓕᒐᓕᐅᕐᓂᕐᒥᑦ ᓄᓇᑦᑎᐊᕐᒧᑦ..
1977: ᑲᑎᒪᑎᑦᑎᓚᐅᖅᑎᓪᓗᒋᑦ ᐃᓄᓐᓂᒃ, ᐃᓄᐃᑦ ᑕᐱᕇᔅᓴᒃᑯᑦ ᑲᓇᑕᒥ ᐱᓕᕆᕙᓪᓕᐊᓕᖅᑐᑦ ᑐᔅᓯᖃᐅᑎᓂᖏᓐᓂ ᓄᓇᕗᑦᑖᕈᒪᓂᖏᓐᓂ ᐊᐃᑉᐱᖅᓯᒪᓪᓗᓂ ᐱᖓᓱᓂᒃ ᒪᑉᐱᒐᖃᖅᑐᓂ ᐅᓂᒃᑳᓕᐊᖑᓯᒪᔪᖅ ᐊᑎᖃᖅᑐᖅ ᓂᓪᓕᐊᓂᖅ ᓄᓇᖃᖅᑳᖅᑐᒥᓂᕐᓄᑦ ᑲᓇᑕᒥᐅᓄᑦ ᐅᑭᐅᖅᑕᖅᑐᒥ. ᑖᓐᓇ ᑐᔅᓯᕋᐅᑎᒃ ᓴᖅᑮᒍᒪᓂᖏᓐᓂ ᐊᐅᓚᑦᑎᒍᑎᒋᒐᔭᖅᑕᖏᓐᓂ ᐃᓄᓕᒫᓄᑦ ᒐᕙᒪᖃᕐᓗᑎᒃ.
1979: ᐃᓄᐃᑦ ᑲᓛᖡᑦ ᓄᓈᓂ ᓇᒻᒥᓂᖅ ᒐᕙᒪᑖᖅᑐᑦ ᑕᐃᓂᔅ ᒐᕙᒪᒃᑯᖏᓐᓂ.
1979: ᐃᓄᐃᑦ ᑕᐱᕇᔅᓴᒃᑯᑦ ᑲᓇᑕᒥ ᓴᖅᑮᕗᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐱᖓᔪᐊᓐᓂ ᑐᔅᓯᕋᐅᑎᖓᓐᓂ ᓄᓇᕗᑦᑖᕈᒪᓂᖏᓐᓂ ᐅᓂᒃᑳᓕᐊᕆᓯᒪᔪᓂᒃ ᑲᑎᒪᔨᓕᐅᕐᓂᖅ ᓄᓇᕗᒻᒥ. ᑕᐱᕇᔅᓴᒃᑯᑦ ᐃᓕᓴᖅᓯᕗᑦ ᓄᓴᕗᑦ ᐊᐅᓚᑕᐅᒐᔭᖅᑐᓂ ᐃᓄᓕᒫᕐᓄᑦ ᒐᕙᒪᐅᓗᑎᒃ.
1979: ᖃᒪᓂᑦᑐᐊᕐᒥ ᐃᖅᑲᖅᑐᐃᕕᒃᑰᖅᑕᐅᓯᒪᔪᖅ ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᖏᑦ, ᐃᖅᑲᐅᒪᔭᐅᓗᐊᖅᓯᒪᓐᖏᑦᑐᓂᒃ ᓄᓇᓂᒃ ᐅᓂᒃᑳᖅᑐᐊᑐᖃᕐᓂᓪᓗ, ᒪᓕᔅᓯᒪᔪᖃᓐᖏᑦᑎᐊᕐᖓᑦ ᒪᓕᒐᕐᓂᑦ ᐊᖏᕈᑎᓂᓪᓘᓐᓃᑦ ᐊᑎᓕᖅᓯᒪᔪᑦᑕᖃᓐᖏᒻᒪᑦ.
1979: 2,845-ᓂᒃ ᓄᓇᑦᑎᐊ ᒐᕙᒪᒃᑯᖏᑦ ᐃᖅᑲᓇᐃᔭᖅᑎᖃᖅᑐᑦ. 500 ᓄᓇᖃᖅᑳᖅᓯᒪᔫᓪᓗᑎᒃ ᐅᕝᕙᓘᓐᓃᑦ ᐃᓅᓪᓗᑎᒃ. ᑭᓯᐊᓂᓕ, 22 ᒪᓕᒐᓕᐅᖅᑎᐅᖃᑕᐅᔪᑦ ᓄᓇᑦᑎᐊᕐᒧᑦ ᔨᐊᓗᓇᐃᒥ ᓄᓇᖃᖅᑳᖅᑐᒥᓂᐅᓪᓗᑎᒃ ᐃᓄᐃᓪᓗ.
1980: ᑐᕆᐅᓕ ᐅᓂᒃᑳᖓ (ᐅᓂᒃᑳᖅ ᑭᒡᒐᖅᑐᐃᔨᑦᑕᖃᕆᐊᖃᕐᓂᖏᓐᓂ ᒪᓕᒐᕐᔪᐊᖅᑎᒍᑦ ᓄᓇᑦᑎᐊᕐᒥ) ᐊᑐᓕᖁᔨᓚᐅᖅᓯᒪᕗᖅ ᐊᑕᐅᓯᐅᖁᔨᓪᓗᑎᒃ ᓄᓇᑦᑎᐊᕐᒥ.
1981: “ᑕᐃᒪᐃᓪᓗᐊᖁᔨᓪᓗᑎᒃ”, ᓄᑖᕐᒥᑦ ᒐᕙᒪᑐᖃᒃᑯᑦ ᐱᖁᔭᖓᓐᓂ ᓄᓇᑖᕈᑎᓄᑦ. ᐊᑎᖃᖅᑐᖅ ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᑖᕆᐊᖃᕐᒥᔪᑦ ᓄᓇᖓᓐᓂ ᓇᒻᒥᓂᕐᓗ ᒐᕙᒪᖃᕐᓗᑎᒃ ᐊᑎᓕᐅᖅᓯᓕᕈᑎᒃ ᓄᓇᑖᕈᑎᒥᒃ. ᐊᓯᔾᔨᓚᐅᖅᓯᒪᔪᖅ ᑲᓇᑕᐅᑉ ᐱᖁᔭᕐᔪᐊᖓᓐᓂ ᐃᓕᓴᖅᓯᓯᒪᓕᖅᑐᑎᒃ ᓇᓗᓇᐃᖅᓯᓪᓗᑎᓪᓗ ᓄᓇᖃᖅᑳᖅᑐᒥᓂᕐᓂᑦ (ᐊᓪᓚᓂᒃ, ᐃᖅᑯᓕᓂᒃ ᐃᓄᓐᓂᓪᓗ), ᐊᓪᓚᐃᓪᓗ ᐱᔪᓐᓇᐅᑎᖏᓐᓂ.
1981: ᐊᓪᓚᖓᔪᑦ ᐃᖅᑭᓖᓪᓗ ᑲᑐᔾᔨᖃᑎᒌᖏᑦ ᓄᓇᑦᑎᐊᕐᒥ ᓴᖅᑮᓚᐅᖅᓯᒪᔪᑦ ᐱᓕᕆᐊᕆᔪᒫᖅᑕᖏᓐᓂ ᐊᑎᖃᖅᑐᓂᒃ ᑭᒃᑯᑐᐃᓐᓇᕐᓄᑦ ᒐᕙᒪᐅᔪᖅ ᐃᓄᓐᓄᑦ ᐅᑭᐅᖅᑕᖅᑐᒥ. ᓄᑖᕐᒥᑦ ᑐᔅᓯᕋᖅᑐᑦ ᒐᕙᒪᐅᒐᔭᖅᑐᓂᒃ ᒪᑲᓐᔨ ᕚᓕᒧᑦ ᓴᓐᖏᓂᖃᕐᓗᑎᒃ ᐊᕕᑦᑐᖅᓯᒪᔪᖅᑎᑐᑦ, ᑕᐃᔭᐅᓗᓂ ᑕᓇᓐᑕᐃᒥᑦ.
1981: ᓄᓇᑦᑎᐊᑉ ᒪᓕᒐᓕᕆᔨᒃᑯᖏᑦ ᓂᕈᐊᖅᓯᓚᐅᖅᓯᒪᔪᑦ ᑎᓴᒪᐅᔪᖅᑐᓂᒃ ᓯᕗᓕᖅᑏᑦ ᑲᑎᒪᔨᕋᓛᕆᓂᐊᖅᑕᖏᓐᓂ, ᐃᖃᓯᐅᑎᓪᓗᒍ ᐅᖃᖅᑎᐅᓂᐊᖅᑐᖅ. ᒪᓕᒐᓕᐅᖅᑎᓕᒫᑦ ᓂᕈᐊᓚᐅᖅᑐᑦ ᓯᕗᓕᖅᑎᒋᓂᐊᖅᑕᖓᓐᓂ ᒐᕙᒪᒃᑯᓐᓂ.
1982: ᐃᓄᐃᑦ ᑲᓇᓐᓇᖓᓂ ᑲᓇᑕᐅᑉ ᐅᑭᐅᖅᑕᖅᑐᖓᓐᓂ ᓴᖅᑮᓚᐅᖅᓯᒪᔪᑦᑦ ᑐᓐᖓᕕᒻᒥᑦ ᓄᓇᕗᒻᒧᑦ ᐊᐃᕙᔨᐅᓂᐊᖅᑐᑦ ᓄᓇᑖᕈᑎᓄᑦ ᐊᒻᒪᓗ ᓴᖅᑭᖅᑕᐅᓂᖓᓐᓄᑦ ᓄᓇᕗᑦ ᒐᕙᒪᑐᖃᒃᑯᓂᓪᓗ. ᑕᐃᑲᓂ ᐱᓕᕆᐊᖏᓐᓂ, ᐃᓄᐃᑦ ᑕᐱᕇᔅᓴᒃᑯᑦ ᑲᓇᑕᒥ ᐊᐃᕙᓕᐅᓂᐊᖅᑐᑎᒃ ᐋᑐᕚᒥ.
1982: ᑭᒃᑯᓕᒫᕐᓂᑦ ᓂᕈᐊᖅᑎᑦᑎᓚᐅᖅᑐᑦ ᓄᓇᑦᑎᐊᕐᒥ. ᐃᑲᔪᖅᑐᐃᓪᓗᑎᒃ 56% ᓂᕈᐊᖅᑐᑦ. 52%-ᑐᐃᓐᓇᐅᓪᓗᑎᒃ ᓂᕈᐊᕈᓐᓇᖅᑐᑦ ᓂᕈᐊᖅᑐᑎᒃ.
1982: ᒪᓕᒐᕐᔪᐊᖅ, ᑲᓇᑕᐅᑉ ᐱᔪᓐᓇᐅᑎᖏᓐᓂ, ᐅᑎᖅᑎᖅᑕᐅᓯᒪᔪᕐᓗ ᑲᓇᑕᐅᑉ ᒪᓕᒐᕐᔪᐊᖓ. ᓕᐳᕈᒃᑯᑦ ᒐᕙᒪᒃᑯᖏᑦ ᐱᐅ ᑐᕉᑐᒥᑦ ᖁᔭᓈᖅᑎᑐᐃᓐᓇᓚᐅᖅᑐᖅ ᑐᑭᖓᓐᓂ “ᐱᑕᖃᖅᑐᖅ” ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᖏᓐᓂ ᒪᓕᒐᕐᔪᐊᕐᓂᑦ, ᓱᓕᓂᕋᖅᑐᓂ ᓄᓇᖃᖅᑳᖅᑐᒥᓂᕐᓂᑦ ᓯᕗᓕᖅᑎᖃᕐᓂᐊᕐᖓᑕ ᒥᓂᔅᑕᐅᓂᐊᖅᑐᑦ ᑲᑎᒪᓂᖏᓐᓂ ᓄᓇᖃᖅᑳᖅᑐᒥᓂᕐᓂᑦ ᒪᓕᒐᓕᕆᓂᕐᔪᐊᕐᒥᑦ. ᑕᐃᒃᑯᐊ ᑲᑎᒪᓂᐅᓚᐅᖅᑐᑦ ᒪᓕᑦᑐᑎᒃ 37.1-ᒥᑦ ᒪᓕᒐᕐᔪᐊᕐᓂᑦ.
1983-1987: ᓯᕗᓕᖅᐹᑦ ᒥᓂᔅᑕᐃᑦ ᑲᑎᒪᓂᖏᑦ ᓄᓇᖃᖅᑳᖅᑐᒥᓂᕐᒥ ᒪᓕᒐᕐᔪᐊᓕᓂᕆᓂᕐᒥᑦ. ᐅᖃᐅᓯᐅᔪᐃᑦ ᓄᖅᑲᑐᐃᓐᓇᓚᐅᖅᓯᒪᔪᑦ ᓄᓇᖃᖅᑳᖅᑐᒥᓃᑦ ᓇᒻᒥᓂᖅ ᒐᕙᒪᓕᕆᓂᕐᒥᑦ.
1984: ᐃᓅᕕᐊᓗᐃᑦ ᓄᓇᑖᕈᑎᔅᓴᒥᑦ ᐊᖏᕈᑎᓕᐅᓚᐅᖅᑐᑦ (ᐃᓅᕕᐊᓗᐃᑦ ᑭᖑᓪᓕᖅᐹᒥ ᐊᖏᕈᑎᐅᔪᓂᒃ) ᒐᕙᒪᑐᖃᒃᑯᓐᓂ.
1984: ᐸᓄ ᐅᓂᒃᑳᖓ ᒪᑐᐃᖅᓯᓚᐅᖅᑐᖅ ᐃᓕᓴᖅᓯᒍᑎᔅᓴᓂᒃ ᓄᓇᖃᖅᑳᖅᑐᒥᓂᕐᓂᑦ ᑎᒍᓯᒍᓐᓇᕐᓂᖏᓐᓂ ᓯᕗᓪᓕᒥᓂᖏᓐᓂ ᐱᔪᓐᓇᐅᑎᖃᕐᓂᕐᒥᑦ ᓇᒻᒥᓂᖅ ᒐᕙᒪᖃᕐᓂᕐᒥᑦ, ᐃᓱᒪᒋᔭᐅᓚᐅᖅᓯᒪᖏᓐᑦᑐᑦ ᑕᒪᒃᑯᐊ ᓕᐳᕈ ᒐᕙᒪᒃᑯᓐᓂ.
1985: ᑲᓐᓲᕕᑎᒃᑯᑦ ᒐᕙᒪᒃᑯᖏᑦ ᒪᓕᑦᑐᑎᒃ ᓄᑖᕐᒥᑦ ᒥᓂᔅᓴᐅᔪᒥᑦ ᐳᕋᐃᔭᓐ ᒪᓘᓂᒥᑦ ᓴᖅᑮᓚᐅᖅᓯᒪᔪᑦ ᑰᓕᑲᓐ ᑲᑎᒪᔨᕋᓛᖏᓐᓂ ᓄᓇᑖᕈᑎᔅᓴᒥᑦ ᐱᖁᔭᓕᐅᕐᓂᕐᒥᑦ.
1986: ᑰᓕᑲᓐᑯᑦ ᐅᓂᒃᑳᓕᐅᓚᐅᖅᓯᒪᔪᑦ ᐊᑎᖃᖅᑐᒥᑦ ᐊᖏᕈᑎᐅᔪᑦ: ᐊᑐᐃᓐᓇᕐᓂᐊᖅᑐᓂᒃ ᐊᖏᕈᑎᓂᒃ. ᒪᓕᑦᑐᒋᑦ ᑰᓕᑲᓐ ᐅᓂᒃᑳᑦ, ᒐᕙᒪᑐᖃᒃᑯᑦ ᐋᖅᑮᓚᐅᖅᓯᒪᔪᑦ ᓄᓇᑖᕈᑎᒧᑦ ᐱᖁᔭᔅᓴᓂᒃ ᐅᖃᖅᓯᒪᓪᓗᑎᒃ ᓇᒻᒥᓂᖅ ᒐᕙᒪᖃᕐᓂᖅ ᐸᖅᑭᑦᑎᓗᑎᓪᓗ ᐱᖅᑯᓯᖏᓐᓂ ᐊᑦᑐᐃᓂᖃᔾᔮᖏᑦᑐᑦ ᐊᓯᖏᓐᓄᑦ ᐊᖏᕈᑎᐅᔪᓂᒃ. ᒐᕙᒪᑐᖃᒃᑯᑦ ᐃᓕᓴᖅᓯᓯᒪᓚᐅᕐᒥᔪᑦ ᐲᖅᑕᐅᓗᑎᒃ ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᖏᑦ ᐋᖅᑭᔅᓯᒪᑦᑕᐅᑎᒋᖃᑦᑕᕐᓂᐊᖏᒻᒪᑕ ᓄᓇᑖᕈᑎᓂᒃ.
1988: ᐊᖏᕈᑏᑦ ᐊᓯᖏᓐᓄᓪᓗ ᐊᖏᖅᑕᐅᓯᒪᔪᑦ ᑕᓇᐃᓄᑦ/ᐃᖅᑭᓕᓄᑦ ᓄᓇᑖᕈᑎᖏᓐᓂ.
1990: ᐊᑎᓕᐅᖅᑕᐅᓪᓗᑎᒃ ᓄᓇᕗᑦ ᓄᓇᑖᕈᑎᐅᑉ ᐊᖏᕈᑎᖏᓐᓂ ᐊᔾᔨᒌᓐᖏᑦᑐᓄᑦ.
1990: ᑕᓇᐃ/ᐃᖅᑭᓖᓪᓗ ᓄᓇᑖᕈᑎᖓ ᐊᖏᕈᑎᖓ ᑭᖑᓪᓕᖅᐹᖅ ᐊᖏᖅᑕᐅᓐᖏᑦᑐᖅ ᐊᕐᕌᒍᑕᒫᖅᓯᐅᑎᓂᒃ ᑲᑎᒪᑎᓪᓗᒋᑦ ᑕᓇᐃ ᕼᐊᐃ ᕆᕗᒥ
1990: ᐃᓚᐃᔭ ᕼᐊᐳ, ᐃᑲᔪᖅᑐᖅᑕᐅᓪᓗᓂ ᑲᑎᒪᔨᖏᓐᓄᑦ ᐊᓪᓚᓄᑦ, ᓈᒻᒪᓴᓐᖏᑦᑐᑦ ᒦᑦ ᓚᐃᒃ ᒪᓕᒐᖏᓐᓄᑦ ᐱᔪᓐᓴᐅᑎᑖᖅᑎᑦᑎᓪᓚᕆᓐᖏᑦᑐᑦ ᓄᓇᖃᖅᑳᖅᑐᒥᓂᕐᓂᑦ. ᐊᖏᓐᖏᓐᓂᖓᓐᓄᑦ ᑐᑭᖃᓕᓚᐅᖅᑐᖅ ᒫᓂᑐᐸ ᒪᓕᒐᓕᐅᕐᕕᖏᑦ ᐊᖏᖃᑎᒌᑦᑐᐃᓐᓇᐅᒍᓐᓇᓚᐅᓐᖏᒻᒪᑕ ᐱᐅᓯᕚᓪᓕᕈᑎᐅᒐᔭᖅᑐᓂᒃ ᒪᓕᒐᕐᓂᑦ.
1990: ᐆᑲᒃᑯᑦ ᐊᔅᓱᕈᕐᓂᖏᑦ. ᒫᔾᔨᒥ, ᒨᕼᐊᒃᑯᑦ ᑲᓂᓴᑕᑭᒥ ᑯᐸᒻᒥ ᒪᑐᓯᓚᐅᖅᓯᒪᔪᑦ ᓯᕗᓕᒥᓂᖏᓐᓂ ᓇᓪᓕᐅᓂᖅᓯᐅᓂᒥᓂᖏᓐᓂ ᑕᐃᑲᓂ ᐆᑲᒥ ᓴᓇᔭᐅᒍᒪᓚᐅᕐᖓᑦ ᐱᓐᖑᐊᕐᕕᕈᓪᓗᓂ ᒎᑉᐱᕐᒥᑦ. ᐊᔅᓱᕉᑎᖃᓚᐅᖅᑐᑦ ᐸᓖᓯᒃᑯᑦ ᓄᖅᑲᑎᑦᑎᒍᓐᓇᓚᐅᖅᓯᒪᓐᖏᑦᑐᑦ ᒨᕼᐊᒃᑯᓐᓂ. ᑭᖑᓂᖓᓂ, ᑯᐸᒃᑯᑦ ᒐᕙᒪᒃᑯᖏᑦ ᐊᐱᕆᓚᐅᖅᓯᒪᔪᑦ ᑲᓇᑕᐅᑉ ᒐᔭᒪᒃᑯᖏᓐᓂ ᐅᓇᓕᓐᓂᑦ ᑕᐃᑯᓐᖓᖁᔨᓪᓗᑎᒃ. ᐊᔅᓱᕈᓐᓂᐅᓚᐅᖅᑐᖅ ᐃᓱᓕᓚᐅᖅᓯᒪᔪᖅ ᓰᑏᑉᐱᕆ 26-ᒥ, ᒨᕼᐊᒃᑯᑦ ᒪᑐᓯᒪᑎᑦᑎᒍᓐᓃᓚᐅᖅᓯᒪᔪᑦ.
1991: ᐊᔅᓱᕈᓐᓇᖅᑐᒦᓚᐅᖅᑎᓪᓗᒋᑦ ᐆᑲᒥ ᑲᔪᓯᓐᖏᓐᓂᖓᓐᓂᓪᓗ ᒦᒃ ᑕᓯᖓᓐᓂ ᐊᖏᕈᑎᒥᒃ, ᑲᓐᓲᕕᑎᒃᑯᑦ ᒐᕙᒪᒃᑯᖏᑦ ᐳᕋᐃᔭᓐ ᒪᓘᓂ ᓴᖅᑮᓚᐅᖅᓯᒪᔪᖅ ᕈᐃᔪ ᑲᑎᒪᔨᖏᓐᓂ ᓄᓇᖃᖅᑳᖅᑐᒥᓂᕐᓂᑦ ᖃᐅᔨᓴᖁᓪᓗᒋᑦ ᐊᑦᑐᐊᓂᖃᖅᑐᓂᒃ ᐱᑐᖃᐅᔪᓂᒃ ᑲᓇᑕᐅᑉ ᒐᕙᒪᒃᑯᖏᓐᓂ ᐊᒻᒪᓗ ᓄᓇᖃᖅᑳᖅᑐᒥᓂᕐᓂᑦ.
1991: ᒍᐃᑦᓯᓐ ᐊᑎᓕᐅᓚᐅᖅᓯᒪᔪᑦ ᓄᓇᑖᕈᑎᒧᑦ ᐊᖏᕈᑎᖓᓐᓂ ᒐᕙᒪᑐᖃᒃᑯᓐᓂ ᐊᒻᒪᓗ ᐊᕕᑦᑐᖅᓯᒪᔪᓂᒃ ᒐᕙᒪᐅᔪᓂᒃ.
1992: ᒪᐃᒥ, ᐊᒥᓲᓂᖅᓴᐃᑦ ᓂᕈᐊᖅᑐᖅ ᓄᓇᑦᑎᐊᕐᒥ ᐊᖏᖅᓯᓚᐅᖅᓯᒪᔪᑦ ᑭᓪᓕᔅᓴᖓᓐᓂ ᐊᕕᑕᐅᓂᐊᖅᑎᓪᓗᖏᑦ ᓄᓇᑦᑎᐊᖅ ᓄᓇᕗᒻᒥ: ᓄᓇᑦᑎᐊᕐᒥ ᐅᐊᓐᓇᖓᓂ ᓄᓇᕗᓪᓗ ᑲᓇᓐᓇᖓᓂ.
1992: ᓅᕖᑉᐱᕆᒥ, ᐃᓄᐃᑦ ᓄᓇᕗᒻᒥ ᐆᒻᒪᑎᑦᑎᓚᐅᖅᓯᒪᕗᑦ ᓄᓇᕗᑦ ᓄᓇᑖᕈᑎᖓᓐᓂ ᐊᖏᕈᑎᖓᓐᓂ (ᓄᓇᕗᒻᒥ ᐊᖏᕈᑎᒃ). ᐊᑦᑐᑉᐱᕆ 30-ᒥ, ᐃᓄᓕᕆᔨᑐᖃᒃᑯᑦ, ᓄᓇᑦᑎᐊᓪᓗ ᒐᕙᒪᒃᑯᖏᑦ ᐊᒻᒪᓗ ᑐᓐᖓᕕᒃᑯᑦ ᑲᑐᔾᔨᖃᑎᒌᖏᑦ ᓄᓇᕗᒻᒥ ᐊᑎᓕᐅᖅᓯᓚᐅᖅᓯᒪᔪᑦ ᒪᓕᒐᕐᓂᑦ ᒪᓕᒐᖅᑎᒎᖅᑐᓂ ᐃᓕᓴᕆᔭᐅᓕᖅᑐᓂ ᓴᖅᑭᕐᓂᖓᓐᓄᑦ ᓄᓇᕗᑦ.
1992: ᓵᕈᑕᓐ ᒪᓕᒐᖏᑦ ᓵᓚᐅᓪᓗᓂ ᑲᓇᑕᒥ ᓂᕈᐊᕐᓂᖏᓐᓂ.
1993: ᒪᐃᒥ, ᓯᕗᓕᖅᑎ ᐳᕋᐃᔭᓐ ᒪᕉᓂ, ᓄᓇᑦᑎᐊᑉ ᒐᕙᒪᒃᑯᖏᑦ ᓯᕗᓕᖅᑎᖓ ᓇᓕ ᑯᐊᓐᓄᐊᔭᐃ, ᐊᒻᒪᓗ ᑐᓐᖓᕕᒃᑯᑦ ᑲᑐᔾᔨᖃᑎᒌᖏᑦ ᓄᓇᕗᒻᒥ ᐊᖏᔪᖅᑳᖓ ᐹᓪ ᖁᐊᓴ ᐊᑎᓕᐅᕆᓚᐅᖅᓯᒪᔪᑦ ᓄᓇᕗᑦ ᐊᖏᕈᑎᖓᓐᓂ ᐃᖃᓗᓐᓂ.
1993: ᓄᓇᕗᑦ ᑐᓐᖓᕕᕈᓚᐅᖅᓯᒪᔪᑦ ᑕᐃᓐᓇ ᑐᓐᖓᕕᐅᓚᐅᖅᓯᒪᔫᒐᓗᐊᖅ ᑲᑐᔾᔨᖃᑎᒌᖏᑦ ᓄᓇᕗᒻᒥ. ᑐᓐᖓᕕᒃᑯᑦ ᑎᒥᐅᓕᖅᑐᑎᒃ ᑭᒡᒐᖅᑐᐃᓪᓗᑎᒃ ᐃᓄᓐᓂᒃ ᒪᓕᑦᑐᒋᑦ ᓄᓇᕗᑦ ᓄᓇᑖᕈᑎᐅᑉ ᐊᖏᕈᑎᖓᓐᓂ.
1993: ᔫᓂᒥ, ᓄᓇᕗᑦ ᓄᓇᑖᕈᑎᐅᑉ ᐊᖏᕈᑎᖓᓐᓂ ᐱᖁᔭᖓ ᐊᒻᒪᓗ ᓄᓇᕗᑦ ᐱᖁᔭᖓ ᐊᑐᓕᖅᑎᑕᐅᓪᓗᑎᒃ ᒪᓕᒐᓕᐅᖅᑎᕐᔪᐊᕐᓄᑦ ᐋᑐᕚᒥ.
1993: ᓄᓇᕗᑦ ᐊᑐᓕᖅᑎᑦᑎᔨᒃᑯᑦ ᑲᑎᒪᔨᖏᑦ ᓴᖅᑮᓚᐅᖅᓯᒪᔪᑦ ᓄᓇᕗᑦ ᐱᖁᔭᖓᓐᓂ. ᑐᕌᒐᖏᑦ ᐅᖃᐅᔾᔨᒋᐊᕆᖃᑦᑕᕐᓗᑎᒃ ᐱᖓᓱᓂᒃ ᐱᓕᕆᖃᑎᒌᑦᑐᓂᒃ ᒪᓕᒐᖅᑎᒍᑦ, ᒐᕙᒪᑐᖃᒃᑯᑦ, ᓄᓇᑦᑎᐊᑉ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᑐᓐᖓᕕᒃᑯᖏᑦ, ᓴᖅᑭᖅᑕᐅᓂᖓᓐᓄᑦ ᓄᓇᕗᑦ ᒐᕙᒪᒃᑯᖏᑦ.
1994: ᔮᓐᓄᐊᕆᒥ, ᓯᕗᓪᓕᖅᐸᒥ ᑲᑎᒪᓚᐅᖅᓯᒪᔪᑦ ᓄᓇᕗᑦ ᐊᑐᓕᖅᑎᑦᑎᔨᒃᑯᑦ ᑲᑎᒪᔨᖏᑦ.
1995: ᐊᑐᓕᖅᑎᑦᑎᔨᒃᑯᑦ ᓴᖅᑮᓚᐅᖅᓯᒪᕗᑦ ᐅᓂᒃᑳᕐᓂᑦ ᐊᑎᖃᖅᑐᒥᑦ ᑐᒦᑦ ᐊᐳᑎᑖᖅᑲᐅᒥ. ᑖᓐᓇ ᐅᓂᒃᑳᖅ ᒪᓕᑦᑐᖅ ᓄᓇᕗᑦ ᒐᕙᒪᒃᑯᖏᓐᓂ. ᐃᓗᓕᖃᖅᑐᖅ 104-ᓂᒃ ᐊᑐᓕᖁᔭᐅᔪᓂᒃ ᖃᓄᖅ ᓄᓇᕗᑦ ᒐᕙᒪᒃᑯᖏᑦ ᐋᖅᑭᔅᓯᒪᒋᐊᖃᕐᓂᐊᕐᒪᖔᖅ. ᑕᐃᒃᑯᓇᓐᖓᑦ ᐊᑐᓕᖁᔭᐅᔪᓂᒃ ᓴᖅᑮᓗᑎᒃ ᒪᕐᕉᓐᓂᒃ ᓂᕈᐊᖅᑕᐅᓯᒪᔫᓐᓂᒃ ᑭᒡᒐᖅᑐᐃᒐᔭᖅᑐᒃ ᐊᖑᑦ ᐊᕐᓇᕐᓗ ᑕᐃᒫᓪᓗᐊᖁᓪᓗᒋᑦ ᓄᓇᕗᒻᒥ ᒪᓕᒐᓕᐅᕐᕕᖓᓐᓂ.
1995: ᓄᓇᕗᒻᒥᐅᑦ ᓂᕈᐊᓚᐅᖅᓯᒪᔪᑦ ᐃᖃᓗᓐᓂ ᓯᕗᓂᔅᓴᑎᓐᓂ ᑐᑦᑕᕐᕕᐊᓂᐊᖅᑐᒥᒃ.
1996: ᕈᐃᔪ ᑲᑎᒪᔨᖏᑦ ᓄᓇᖃᖅᑳᖅᑐᒥᓂᕐᓄᑦ ᐅᓂᒃᑳᓕᐅᓚᐅᖅᓯᒪᔪᑦ ᑕᓪᓕᒪᖓᓐᓂ, 4,000-ᖑᓪᓗᑎᒃ ᒪᑉᐱᒐᐃᑦ. ᑲᑎᒪᔨᖏᑦ ᐃᓕᓴᖅᓯᓚᐅᖅᑐᑦ ᐱᒻᒪᕆᐅᓂᖏᓐᓂ ᓄᓇᖃᖅᑳᖅᑐᒥᓃᑦ ᓇᒻᒥᓂᖅ ᒐᕙᒪᖃᕐᓗᑎᒃ ᐊᒥᓱᓂᓪᓗ ᐊᑐᓕᖁᔭᐅᓯᒪᔪᒃ ᐱᐅᓯᕚᓪᓕᖅᑎᒐᓱᐊᕐᓗᒋᑦ ᑖᒃᑯᓂᖓ ᐊᑦᑐᐊᓂᖃᕐᓂᖏᓐᓂ ᓄᓇᖃᖅᑳᖅᑐᒥᓂᕐᓂᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓂ.
1996: ᓄᓇᕗᑦ ᐊᑐᓕᖅᑎᑦᑎᔨᒃᑯᑦ ᐅᓂᒃᑳᓕᐅᓚᐅᖅᓯᒪᕗᑦ ᐊᐃᑉᐸᖓᓐᓂ ᐊᑎᖃᖅᑐᒥᒃ ᑐᒦᑦ ᐊᐃᑉᐸᖓ. ᐃᓗᓕᖃᐅᖅᑐᓂᒃ ᑲᒪᒋᔭᐅᒋᐊᖃᖅᓯᒪᔪᓂᒃ ᓯᕗᓪᓕᖅᐹᖓᓐᓂ ᐅᓂᒃᑳᓕᐊᒥᓂᕐᒥᑦ ᓄᒦᑦ ᐊᐳᑎᑖᖅᑲᐅᒥ.
1997: ᒪᐃ 26-ᖑᑎᓪᓗᒍ, ᐃᓄᐃᑦ ᓄᓇᕗᒻᒥ ᐊᖏᖅᓯᓚᐅᓐᖏᑦᑐᑦ ᑕᐃᒪᐃᓪᓗᐊᕆᐊᖃᖅᑎᑦᑎᓂᕐᒥᑦ ᐊᕐᓇᓂᒃ ᐊᒻᒪᓗ ᒪᕐᕉᓐᓂᒃ ᑲᑎᒪᔨᐅᔪᓂᒃ ᓂᕈᐊᖅᑎᑦᑎᓚᐅᖅᑐᑦ ᒪᓕᒐᑎᒃ ᐊᑐᖅᑕᐅᖁᔭᕐᒥᑦ.
1997: ᐊᐃᐳᓗ 15-ᒥ, ᑲᒥᓴᓇᒋᑲᐃᓐᓇᖅᑕᖓ ᓄᓇᕗᒻᒥ, ᔮᒃ ᐊᓄᒑᖅ ᑎᒃᑯᐊᖅᑕᐅᓪᓗᓂ ᒥᓂᔅᑕᐅᓂᕐᒧᑦ ᐃᓄᓕᕆᔨᑐᖃᒃᑯᓐᓂ, ᔭᐃᓐ ᓯᑐᕗᑦᒧᑦ. ᓯᕗᓪᓕᖅᐹᖑᓪᓗᓂ ᑲᒥᓴᓇᕈᓚᐅᖅᓯᒪᔪᖅ ᓄᓇᕗᒻᒥ.
1998: ᒫᔾᔨ 4-ᖑᑎᓪᓗᒍ, ᓄᓇᕗᑦ ᒥᓂᔅᑕᐅᑉ ᑐᖏᓕᖏᑦ ᓯᕗᓪᓕᖅᐹᒥ ᑲᑎᒪᓚᐅᖅᓯᒪᔪᑦ.
1999: ᐊᐃᑉᐳᓗ 1-ᒥ, ᓄᓇᕗᑦ ᓴᖅᑭᖅᑕᐅᓪᓗᓂ ᓄᑖᖑᓕᖅᑐᓂ ᑲᓇᑕᒥ ᐊᕕᑦᑐᖅᓯᒪᖃᑕᐅᓕᖅᑐᓂ ᐅᑭᐅᖅᑕᖅᑐᒥ.ᐅᖃᓕᒫᕈᓐᓇᕐᒥᓇᔨ
ᑯᕉ, ᑮᑦ ᖃᓄᐃᑦᑐᖃᑦᑕᖅᓯᒪᓂᖏᑦ ᐃᓄᐃᑦ ᐅᑭᐅᖅᑕᖅᑐᒥ ᑲᓇᑕᒥ. ᒪᒋᐅ-ᑯᐃᓐ ᓯᓚᑦᑐᖅᓴᕐᕕᕐᔪᐊᖓᓐᓂ ᐱᕙᓪᓕᐊᔪᑦ.
ᒪᓐᑐᕆᐊ ᑭᖕᔅᑕᓐ. 1991
ᑎᑲᓐᓴᓐ, ᒫᒃ. ᑭᒃᑰᒻᒪᑕ ᐅᑭᐅᖅᑕᖅᑐᒥ? UBC ᐱᕙᓪᓕᐊᔪᑦ ᕚᓐᑰᕗᒥ. 1992
ᑕᐱ. ᓄᓇᕗᒻᒨᖅᐸᓪᓕᐊᓂᖅ. ᒥᖕᔅᑕᓐ ᒪᓐᑐᕆᐊᒥᓗ:. 1988
ᐃᓄᓕᕆᔨᑐᖃᒃᑯᑦ ᑐᓐᖓᕕᒃᑯᓪᓗ ᑲᑐᔾᔨᖃᑎᒌᖏᑦ ᓄᓇᕗᒻᒥ, 1990. ᐊᖏᕈᑎᒃ ᐊᓯᖏᓐᓄᓪᓗ ᐊᑎᓕᐅᖅᑕᐅᓯᒪᓪᓗᑎᒃ ᐃᓄᓐᓄᑦ ᓄᓇᕗᒻᒥᐅᑕᕐᓄᑦ ᐊᒻᒪᓗ ᑯᐃᒃ ᐱᔪᓐᓴᐅᑎᖏᓐᓂ ᑲᓇᑕᒥ. 1990
ᕌᐳ ᒪᒃᐳᓴᓐ. 2003, ᓄᑖᑦ ᑎᒍᒥᐊᕆᐅᖅᑐᑦ ᓇᒻᒥᓂᖅ ᓄᓇᒋᔭᕋᓗᐊᒥᓂᒃ, ᐅᔭᕋᕐᓂᐊᕐᓂᕐᒥᑦ ᐊᒻᒪᓗ ᐃᓄᐃᑦ ᓄᓇᑖᕈᑎᖓᓐᓂ, ᑭᐅᒍᕆ: ᓯᓚᑦᑐᖅᓴᕐᕕᕐᔪᐊᖓ ᑭᐅᒍᕆᒥ ᐱᕙᓪᓕᐊᔪᑦ.
ᓄᓇᕗᒻᒥ ᐊᑐᓕᖅᑎᑦᑎᔩᑦ ᑲᑎᒪᖏᔨᑦ. ᑐᒦᑦ ᐊᐳᑎᑖᖅᑲᐅᒥ. 1995
ᓄᓇᕗᒻᒥ ᐊᑐᓕᖅᑎᑦᑎᔩᑦ ᑲᑎᒪᖏᔨᑦ. ᑐᒦᑦ ᐊᐃᑉᐸᖓ. 1996
ᐱᐅᕆᑦ, ᑖᓄᑦ. ᐃᓄᐃᑦ ᓄᓇᖓᓪᓗ: ᐅᓂᒃᑳᖅ ᓄᓇᕗᑦ ᒥᔅᓵᓄᑦ. ᑐᕌᓐᑐ: ᔭᐃᒻᔅ ᓗᐊᕆᒧ. 1992
